Qiddist Gezaheny
Addis Ababa:- Mittimmate maamarra roorenkanni daga horonsidhannoha Giwirinnunna Industrete laalcho shiqishshanno gede assatenni waagu lexxanna dikkote iibbabba ajishate loonsanni hee’noonnita Sidaamu qoqqowi daddalunna dikkote latishshi biiro xawissino.
Qoqqowu daddalunna dikkote latishshi biiro sooreessi kalaa Ashshaagre Jemberehu baxxinohunni qoqqowoho waagu lexxa lainohunni Itophiyu pireesete uurrinsha, Bakkalcho Gaazeexira xawisino garinni; Hawaasi quchuma kaima assatenni qoqqowoho afantanno mittimmate maamarra roorenkanni daga horonsidhannoha gibrinnunna Industrete laalcho shiqishshanno gede assatenni waagu lexxa ajishate sharro assinanni hee’noonni yino.
Hawaasi quchuma kaima assiniro wole quchummarano loosa dandiinanni daafira dikko geisate kaayyo heedhannotano lede qummi assino. Waagu lexxo aana biirote garinni qorqorshu looso loonsanni hee’noommo yinohu kalaa Ashshaagre; konninnino Sidaami qoqqowu garinni dikkote lexxo dileeltino, ikkollana faabrikaho kaimunni waaga lendoonni daafira wole laalchuwa ledo heewisiinsanni woyte woyyimma heedhurono alba rosaminowiinni waagu lexxo kalaqantinota coyi’rino.
Konni daafira xaphooma biirote garinni dikkote akati aana qorqorsha assinanni hee’noonniha ikkanna; konninnino bikku aleenni waaga leddannore, laalcho maaxxannorenna bikkaanchu qorqorsha assinanni hee’noonnitanna togoo assoote gumultannore daddalu fajjonsa anganni haa’rate geeshsha qorichinshanni hee’noonnitaati biirote sooreessi kalaa Ashshaagre xawisinohu.
Federaalete mootimma irkonni daannoha Zaytenna Sukkare lawino laalcho qoqqowoho afantanno 29 dhuka afidhino mittimmate maamarra widoonni iillishate loonsanni hee’noonni yinohu sooreessu; konni alba mootimmate irkonni daanno laalcho eeli geeshsha dagate iillishate aana mommoddo leeltinota kayse; xaa yannara Qamadete bullee gobbate olantora iillinshanni hee’noonnihura yannate geeshsha gede’nitinota kule federaalete mootimmanni daanno laalchi garunni daganniwa iillanno gede assate loonsanni hee’noonni yino.
Gobba diigate dayno diina gargadhinanni hee’noonni tenne yannanni addi addi garinni mittu wole miicanni ha’ra dinosi yinohu kalaa Ashshaagre; seeriweelo waaga leddanno daddalaano xaadduro daga base basente afamanno daddalu borro mine qummeessa hasiissannonsa yee, baxxinohunni mootimmate irkonni daanno uduunne afi’rate qoosso noonsata huwata hasiissannonsata lede qaagiissino.
Bakkalcho Sadaasa 7/ 2014
