* Cancishaano gaamo Gaashenahonna Antsookiyu qooxeessuwara xibbuunni kiirranni qansoota mitteenni doddolte shitino,
* Cancishaano gaamo haammata barshe gumulatenni turizimete jiro aana iillishshino gawajjo luphiima ikkitinota xawinsoonni,
Abbebech Maatewoos
Cancishaano HWHT gaamo Amaarunna Affaarete qoqqowubbara sircho hunate jaddo iillishshinota mootimmate komunikeeshine owaante egensiissu. Ministir deeta Selaamaawiiti Kaasiti uytino xawishshira egensiissino garinni; cancishaano HWHT gaamo Affaaretenna Amaaru qoqqowubbara sircho hunate jaddo iillishshinota buuxisiissanno tajubba wirro afantino.
Gaashenahonna Antsookiyu qooxeessuwara xibbuunni kiirranni qansooti lubbante mitteenni madaarante afamansa kunnira farcoho yitino. Qoqqobbate babbaxxitino qooxeessuwara turizimete jiro aana gawajjo iillishatenni dagoomano mitiimmate giddora eessitinota xawinsoonni.
Cancishaano gaamo Cinaho, Agamsaho, Gaalikoomaho Qobbote, Kombolchahonna babbaxxitino qooxeessuwara qansoota mitteenni shiitinota qaagiissitinoti ministir deeticho; halaalaancho mashalaqqe hasi`rannohu qooxeessubbate afame buuxa dandaannota coyidhe kalqoomitte dagano tenne gawajjo garunni affanno gede assa mini loosonkeeti yitino.
Wole widoonni ministir deeta xawissino garinni; tini gaamo iillishshino gawajjonni Wodiidi Gonderera, Laastaho, Laalibelahonna babbaxxitino Amaaru qoqqowi qooxeessuwara hattono Affaarete qoqqowira turizimete jiro aana luphiima gawajjo iillitino. Amma`note dona, turizimete owaante uynanni base aana luphiima gawajjo iillishshino. Diyaasfooruno dandaamisi bikkinni irko assara hasiisanno.
Bakkalcho Bocaasa 30 / 2014
