Dagatenna dagoomu barri ayyaana kaphunni ayirrisatenni sa’ne halaalunnimittimmatenni ayirrisate widira sa’noonnita sidaamu qoqqowi pirees sekretaariyaatete borro mini sooreessi kalaa Filiphoos Naahoomihu coyi’ri.
Kalaa Filiphoosi Bakkalcho gaazeexi ledo assino hasaawinni; sa’u 27 dirra giddo hiittenne gobbate hajo aana Sasenna Shoole sainokki qoqqowubba calla beeqqisiisanno amanyooti noota kayse, soorrote gashshooti Itophiyu giddo noo qoqoowubba baalanti gobbate hajo aana taalo beeqqo assate kaayyo kalaqqino yannanni dagatenna dagoomu barra ayirrisa jawa kaayyooti yino.
Tayixeha dagatenna dagoomu barra sidaamu qoqqowi deerrinni ‘’Roduuwimma Gobboomu Mittimmara’’ yaanno massagote qaalinni sa’u lamalara babbaxxino amanyootinni ayirrinsoonnita kaysinohu kalaa Filiphoosi; amanyootu aana addi addi xiinxallote borro shiqqqinotano Xawisino.
Borrote mini sooreessi ledotenni; gobba diigate kaino diina gargadhate jawu oli giddo hee’ne ayirrinsanni hee’noonni barra ikkasino qummi asse; juntu ola faninohu Amaarunna Affaarete daga ledo calla ikkikkinni Itophiya diigate ikkinota Itophiyu daga seekkite huwattino yee ammaneemmo yaatenni; tayixe daganna dagoomu barra ayirrinsi yannara Itophiyu daga baala mitto ikkite gobba gatisate ka’ino yanna ikkasi, Itoophiyu daga juntu tuge saino babbadamooshshu bagado hiiqqinoho yiinokalaqantino urde Itophiyaho kaajjado mittimma kalaqate dago fantinotano buunxoonni yannaati yino.
Bakkalcho Bocaasa 30 / 2014
