Amsaalu Felleqe
Addis Ababa;- Cancishaano gaamo Itophiya diigate hedde mite mite galchimi gobbuwa ledo halamatenni gobbanke aana ola fantino kaiminni gobbanke gadachante olu giddora e’ino. Konni kaiminnino gobba diigamatenni gatisate mootimma tiiu gaado harissanni afantanno.
Baxxinohunnino Bocaasa 14/2014M. Dnni hanafe IFDR Xaphoomu ministirchinna Olu wolquwa xaphishshu hajajaanchi Abiy Ahmedihu (Dr) ‘’Itophiya yaannoha wolambinatu su’ma agarsiisate dhaggete annimma noonke’’ yaannohunni olu basera gaadatenni baalanta ga’labbote wolquwa waaxotenni massago aanni afamanno.
Konninnino olu xawira cancishaanonna horraano wolquwanni amadantinori haammata qooxeessuwa wolassinoonni. Xaphoomu ministirchi olu basera gaadi gedensaanni qarunnu kullanniri lame soorro daggino. Umikkiti Affaarete widoonni nooha Kaasagitta qiisho diigamaseeti. Hakkonni gobbaanni kayinni Gaashenaho noota 6 kiilo meetire seendilli nooseta konkiriitetenni loosidhino qiisho hiiqqatenkanni.
Konni garinnino Xaphoomu ministirchi olu basera gaadi kawa haammata qooxeessuwa cancishaano HWHT horraano gaamonni amadante keeshshitinota wolassinoonni. Hakkonni aancheno 4 qara qara olu base yaano Gaashenaho, Shewa, Soojjaatinna Wiorre Ilu olu xawubbara diina barbadeessate millimmo assinanni keeshshinoonni. Kuri shoolente olu basera Xaphoomu ministirchi ga’labbote wolquwa waaxora massago aatenni jajjabba gumma maareekkisiisa dandiinoonni.
Cancishaanonna horraano gaamo baadiyyeteno ikko quchummate amadde keeshshitino qooxeessuwara mannimmatenna jajjau aana lowo gawajjo iillishshino. Safote latishshuwa, dagoomittenna miinju hattono owaante uytanno uurrinshuwa mulqite gatinoha diiggenna giirte horote gobbaanni assitino. Manchi beettinna jajju aana calla ikkikkini danqa saadano raafatunni shitino.
Xaa geeshshano Kaasagitta, Cifra, Cina, Gaashena, Aqeeti, Worre ilu, Aqesta, Gennete, Shewa Roobit, Molaale, Jaama Degolo, Fincoftu, Raasta, Kombolchu, Kemise, Dese, Laalibelunna wolootuno haammata qarqarra horraano wolqanni amadante keeshshitinota diinu anganni fushhsine wolassinoonnireeti.
Xaphoomu Ministirchinna Olu wolquwa xaphishshu hajajaanchio Dr Aby Ahimedihu xaa yannara gobba diinunni diigantannokki gede gatisate adhinanni hee’noonni qaafonni horraano wolquwa barbadeessinanni hee’noonni. Kiironsa haammata cancishaano gaamo qodhaanono bareedda olantonkera angansa uytanni afantanno.
Togoo qeelle maareekkisiinsanni gede jawa korkaata ikkinohuno Xaphoomu ministirchi bilchaata olu hayyonni massagasinniiti. Diinunni horrante keeshshitino qooxeessuwa wolaphansa kaima assatennino Xaphoomu ministirchi wo’mante Itophiyu daganna ga’labbote wolquwara hattono Itophiyu baxillaanora hawalle tashshi yii’ne yitanno sokkasi saysino.
Sokkasinnino ‘’Itophiyu qeeltanno; Itophiyu hexxo mura hexxo mursiissino; qeelleno suffanno’’ yino. Xaphoomu Ministirchi Abiy Ahmedihu (Dr) qeelletenni dukkisaminoha umikki gafi keeshshosi gude be’ro boode yannara biirosi higino.
Xaphoomu Ministirchi Abiy boode yannara biirosi higinota kaima asse fushshino xawishshinni; techono ikko albirano diinnanke wolqa gananteenna; mimmito gimbetenna gaancete doogonsa agurte; baxillunna keeru doogo doodhita geeshsha sharronke suffanno yino.
Bakkalcho Bocaasa 30 / 2014
