Qiddist Gezaheny
Addis Ababa:– Xaphoomu ministrchi olu base gaadasi gobbasira noosi murciraanchimmanna baxilli xawishshaati yino Hawaasi Yuniversite Poletiku Sayinse rosiisaanchi dokter Nigus Belayihu. Wo’manti Itophiyu Daga massagaanchinke haruma harunsine gobba gatisate gaadi beeqqaano ikka hasiissannotano coyi’rino.
Dr Nigusi Itophiyu Pireesete Uurrinsha ledo bilbilunni assino hasaawinni; Xaphoomu ministrchi olu base gaadate mudho balaxo gobbasi ayirrinyiranna wolambinatira uynoha ikkasi leellishshannota ikkase coyi’rino. Xaphoomu Ministrchi ane mootimmanna massaga heedhannohu gobba heedhurooti yee gaadino; wo’manti Itophiyu dagano massagaanchinsa haruma harunsa hasiissannonsata huwachishinno.
Konni daafira Xaphoomu ministrchi gobba gatisate woshshatto amma’no, biilloonye, ogeeyye, ga’renna koo tee baddinokkite yee; ninke baalunku gobbate massagaanchi woshshatto adhine gaadatenni gobba diinunni gatisate taalu qeechi iimanke uwino yino.
Mite mite galchimi gobbuwanna Miidiyubba fincitannoha kaphu duduwo galchate balanxe xa hananfoonni gaadinni insa soqqamaano ikkitinore, hashshanna barra xiiwo kalaqqanni noo diinna hegerera geegiissinummoro woluri shotaho yinohu Dr Nigusi; Tigrayete daga dhagge, amma’nonna bude huntinore Adiwunni mudhinore kuri allagganna finqila gaamo waamme Tigrayeteno ikko Itophiyu daga wolapho lallambeemmo barri dixeertote yaanni xiwisino.
Dr Nigusi ledotenni Itophiyu diinna bandoonnihu Adiwu qeelle gedensaanniiti; gobbaydi gobbuwa dhaggete hiiqqamme noonsa; mitte lame higge Itophiyunni qeelantino. Hiiqqammensa sissi’rateno untannokki bale dino. Konniraati HWHT qara soqqamaano assite horonsidhannohu; furcho afidhuro Itophiyu haxo heeshshi assite hiiqqammensa sissi’ratenni badhera higgannokkireeti yaanni xawisino.
Konne seeransa wo’manti Itophiyu daganna baxillaano seekkite huwatte mittimmansa kaajjishi’ra qara hajooti yino.
Afriku gobbuwano Itophiyu qotira uurritara hasi’nummoro balanxe ninke mimmitinke ledo mitte hedonni uurra noonke yinohu Dr Nigusi; assinanni hee’noonni gaadi ayeerano yine ikkikkinni Itophiya gatisatenni keeraa’mitinonna wolaphitino gobba ilamate tareessate ikkinota de’’a dinonke. Konni daafira mitte hedonni gaande gobbate wolapho agarsiinso; mitto ikkinummoro irkissannonkeri batinyeho yaanni hedosi worino.
Bakkalcho Bocaasa 23/ 2014
