Amsaalu Felleqe
Addis Ababa;- Itophiyu giddoydi qarrubbase ayino anga worikkinni umisenni tidhate dhuki noose gobba ikkase Chaynunnihu Gobbaydi hajo ministuirchi coyi’ri. Itophiyu xaadinoseha giddoydi qarrira ayino anga worara hasiisannokkita Chaynu ammantanno yino Chaynunnihu gobbaydi hajo ministirchi Wang Yii.
IFDR Miseessu Xaphoomu Ministirchinna Gobbaydi Hajo ministirchi kalaa Demmeqe Mekonninihu Chaynaho gobbaydi hgajo ministirchi ledo lamente gobbuwa hajubba aana hasaabbino.
Lamunku massagaano gumaamo hasaawa assitinota xawisinohu miseessu xaphoomu ministirchinna gobbaydi hajo ministirchi Demmeqe Mekonninihu; Chaynu mootimma Itophiyaho bushu barri jaala ikkatenni leellishshanni noo irko hattono Itophiyu ayirrinye, wolambinatenna gobbate mittimma lainohunni Chaynu amamaddino uurrinsha naadino.
Gobbate keere agarsiisate assinanni hee’noonni wo’naalshirano Chaynu assitanni noo irkonna fultanni noo qeechi daafira galata shiqishino.
Chaynunnihu Gobbaydi Hajo ministirchi Wang Yii isi widoonni; faajjete loosu hajora Itophiya towaatatenni gobbanniha yannate hajo lainohunni lamenti gobbuwa xaadooshshe kaajjishate kaa’lannoho yino. Konnira kayinni Chaynu hasiisanno irko baala kaajjeshshe suffannota egensiisino.
Chaynunnihu gobbaydi hajo ministirchi be’ro soodo faajjete loosu towaanyora Itophiya einoha ikkanna Awuroppu diru kiiro 1970nni hanafe faajjetenni dippilomaasete xaadooshshe hanaffinori Itophiyunna Chaynu xaa yannara daddalunna investimentetenni hattono dippilomaasetenna kaajjado ikkino xaadooshshe kalaqa dandiitino.
Awuroppu diru kiiro 2016nni 2018 mereerono Itophiyui Chaynuwiinni afidhinohu dhaaddotenni gobbaydi investimentenni 4 Biiliyone Ameeriku doolaare meddi yaannoho.
Chaynu mootimma ‘’Belt and Road Initiative’’ widoonnino Itophiyu Addis Ababunni—Jibutete baaburu doogo diriirsatenna Addis Ababunni—Adaamu wiinamu doogo loosira Chaynuwiinni liqoote irko afidhino.
Halantino mangistuwa uurrinsha Ga’labbote amaale mineno Chaynu Itophiyu amaddino halaale huwatatenninna hale ikkatenni huurose macciishshiishshanni dippilomaasete irko assitanni keeshshitinoti.
Bakkalcho Bocaasa 23/ 2014
