Abbebech Maatewoos
Addis Ababa:- Mootimmate oli HWHT cancishaano gaamonna halamaanonsa aana qeelle maareekkanni noota Xaphoomu Ministire borro mini egensiisi.
Wiinamu yanna lallawi cancishaano gaamo assitanno horra uurrisatenninna jaddo gargadhate widoonni gumaamo ikkinota xawinsoonni.
Xaphoomu ministirchi borro mini Pirees sekireetaare Billene Siyyumiti uytino xawishshinni: mootimmate oli cancishaano gaamo aana qeelle maareekkisiisanni no. Xaphoomu ministirchi Dr Abiy Ahmedi olu base geeshsha gaadi gedensaannino maareekkantanni nooti olu xawi qeelle batinyete.
Xaphoomu ministirchi olu basera afama ola ledote qeellera kakkaysasinni sae Itophiyu daga roore halantanno gede assino. Cancishaano gaamo iillishshanno gawajjo daga mittimmate wolqanni gargadhitanno gedeno kaa`lino. Babbaxxitino basera maareekkantino qeelle Affaaretenna Amaaru qoqqowira afantanno bayichuwa amadate dandiisinono yitino.
Baxxinohunni Kaasaggita, Cifira, hattono Burqa qeelle maareekkantino yitinoti pirees sekireetaaritte; cancishaano gaamono gobbannita eonna fulonnita daddallu doogo biso ikkinoha Miile amadate mixo guma abbitukkinni gedensira higganno gede assino. Mootimmate olino woyyino deerrinni albira gugguufanni noota coyidhino.
Xaphoomu ministirchi Dr Abiy Ahmedihu olu basera leelle ola massaga hanafinkunni mitte lamala saino yitinoti Biillene; xaphoomu ministirchi olu base ha`ranno gede assitinosi gumulo mite mite xaadooshshuwa sodhino doogonni tirtanno gede ikkikkinni gobba agadhate noosita mootimmimmate yawo fulateeti yite xawissino.
Wiinamu yanna lallawa lainohunni coyidhinoti Billene; lallawu cancishaano gaamo assitanno horro uurrisatenna jaddo gargadhate widoonni gumaamo ikkino. Gobbate gede lallamboonnihu wiinamu yanna lallawi sase lamala kiirsiisino. Wiinamu yanna lallawi hundaanni gumulantino ga`labbote loossanni Addis Ababahonna babbaxxitino quchummara cancishaano gaamo ledo xaadooshshu noonsa mannootiwiinni olu uduunnenna addi addi garinni irkisate qixxeessidhino uduunne amadatenna cancishaano gaamota mixonsa hunate dandiisino yitino.
Baxxinohunnino olu uduunne, federaaletenninna babbaxxitino ga`labbote bissa aaninni moorantino uddanna, olu xaadooshshi uduunne, kaphunniha ayimmate badooshshenna paaspoortuwa, seerimale doogonni amadantino gobbate giddonn gobbayidi gobbuwa woxe amandoonni. Hattono cancishaano gaamota neetwoorke badatenni HWHT sokko gumulate qixxeessinoonniri hunote uduunni afaminota egensiissino.
Cancishaano gaamo ledo amadisiisaminohunni xaadooshshu noosihu seerunni xa`mamanno gede assinanni hee`noonni. Dagatenni doorantino mootimma dirrisatenna Addis Ababa amadate hedo nooseti cancishaano gaamo xa haaqensa guma seekkannokkita affino yitino.
Wole widoonni Itophiyunnita huuro macciishshiishshanno dagoomitte tuqu xaadooshshi qoolla Tiwiterenna babbaxxitino dagoomittete xadooshshi qoolla cufantanno gede assinoonnita coyidhinoti Biillene Siyyumiti; kunino gobbayidi gobbuwanni kaa`laminnonna Itophiyu mootimma wolqatenni soorrate assinanni qinaabbino xiiwo biso ikkitinota egensiissino.
Qineessinoonni kaphu mashalaqqera biso ikkitino miidiyubba cancishaano gaamo irkissannore haammata kaphu duduwo tuqissanno. Baxxinohunnino HWHT gargartote aana xawo ikkitino gawajjo fanasi anfanni; Itophiyu mootimma sircho bade gudate assoote gumultino yine tuqinsanni mashalaqquwa kaima afidhinokkire ikkansa buunxara hasiisanno. Roorenkanni dagate dambala abbitanni Amaarunna Affaarete qoqqowubba horritinori cancishaano gaamo gumultino barshe baalantera xa`mamaano ikka noonsa yitino.
Bakkalcho Bocaasa 23/ 2014
