Qiddist Gezaheny
Addis Ababunni:- Xaphoomu ministrchi dokter Abiy Ahimedihunni massagantino olanto baalante olu basera luphiima ganote millimmora e’ino ‘’ Gobboomu Mittimma’’ gaadinni xaggeeffachishanno guma borreessiissanni afantanno yino mootimmate xaadooshshi owaante ministrchi dokter Leggese Tulluhu.
Mootimmate xaadooshshi owaante ministrchi dokter Leggese Tulluhu uyno xawishshinni; Gaashenu olu basera jawaata gobbate gargarto, Amaaru baxxitino wolqa, Milishunna Faanno waaxante assitino sharronni Arbiiti, Aqeti, Dabonna Gaashenu quchumma keereensitino.
Tenne basera diinu seeda agannara mulqi’rino jiro horonsi’ratenni amadino qooxeessi daga gadachishatenni loosiisinoha lowo deerri konkiriitete goda qinaabbino mixonni, massagotenna Teknoloojetenni irkisamino shiimu daafurinni godinsa hiiqqamino. Tenne basera batinyu gargarooshshunna gaamote jajjabbu uduunni gobbate olantonni qafadamino. Tini qeelle mooraho e’ino diinu wolqa hallo tirtinote.
Gobbate gargarto Gaashena amadansa diinu Laalibelaho, Woldiyahonna Dese amadino qooxeessa harancho yanna giddo keere fushshate doogo injeessitanno. Gobbate olanto Gaashenanna qooxeessa amadatenni sa’e Laalibelaho, Woldiyahonna Wegel Xeenu ragaanni xaa yannara alba higge gugguuffanni afantanno.
Were’ilu olu basera Jegaama Goollu Were’ilu Gennete, Fincoftu, Aqesta yinanni quchummara jannootu gobbate gargarto, Amaaru baxxitino wolqa, Milishunna Faannote mittoo’manni cancishaanotenni keeree’mitinno.
Shewa olu basera Mezezo, Molaale, Shewa Robitinna qooxeessu hattono Raasunna qooxeessu jannootu gargarooshshu olanto, Amaaru baxxitino wolqa, milishunna Faanno waaxante assitino sharronni cancishaano HWHT nni keereensitino. Jannootu xaano albaagge gugguuffanni afantannota xawisino.
Affaarete olu xawira jawaata gargarooshshu olanto, affaarete baxxitino wolqanna Milishu assitino sharronni keeree’mitino; Kaasagistaani, Burqa, Waa’ima, Direeruqa, cifra Alele Sulula yinanni quchumma wo’munni wo’ma diinu anganni fushshinoonni; qooxeessu gashshootino basesi higino; qooxeessubbano qolle tantanate loossa loonsanni hee’noonni yino.
Baalunku olu xawira daga sinqenna babbaxxinore shiqishatenni, mashalaqqe aatenni hattono billaallitinota hunaano wolqa anga uytanno gede assatenninna qaafo adhatenni naaxxisiissanno sharro assitinota coyi’rino.
Mootimma konne riqiwamannokki qeecha fultanni noo dagara jawa galata shiqishshe kuni kakkaooshshi aante noo olu basera suffanno gede xa’mino.
Cancishaano gaamo olu xawira xaaddanni noonsa qeelama harunsite illachansa kaphu piroppagaandinni gumulsirate wo’naaltanno yannaati yinohu ministrchu; kalqoomu daga raaqate keeraano ganantu, hingeemmowa hoongummo yitanni borro fincate geeshsha iillitino. Daga hiittenne cancu gaamo sorotenna babbadanno duduwinni qorowamatenni hale ikkansa sufa hasiissannonsata huwachishinno.
Bakkalcho Bocaasa 23/ 2014
