Abrahaam Saamueel
Addis Ababa:- Sidaamu Qoqqowi gargartote olantoranna juntu iillishino gawajjonni darantino qansootira ikkannoha 105 miiliyone birra irko assinota Sidaamu Qoqqowi Dagate Xaadooshshi Sooreessi Kalaa Filiphoosi Naahoomihu Xawisino.
Kalaa Filiphoosi Naahoomihu Itophiyu Pireesete uurrinsha Bakkalcho gaazeexira uyno xawishshinni; Cancishaanchu HWHT nna mite mite Galchimi wolquwa fantinonke ola qeelle wolambinatenke buuxisate 3ki doychonni 80 miiliyone birra, woxunni bikkiniro 25 miiliyoone fushshannoha addi addi uduunnenna bootta xaphoomunni 105 miiliyoone birra dubboho ubbanni ka`anni lubbonsa uyte gobba gatisate sharrantanni noo olantora irko assinoonnita kulino.
HWHT junti gobbaydi hunote wolqa ledo halame Itophiya diigate assanni noo sharrenna xagarro galchatenna hunote wolqa mulenni madaarate dandiissanno irko qoqqowu albillichono kaajjishe sufannota kalaa Filiphoosi egensiisino.
Qoqqowu woraddanninna quchumanni konne Juntu faninonke ola galchatenna muli barri giddo Itophiyu qeelle lallawate 10 kume ikkitanno wedellinna addi wolqa gaadde noota kule; Xaphoomu Ministirichi ola ani massageemo olu xawira xaando yee gaadi barrinni hanafe qoqqowinkera daga baxxino garinni kakka’inotanna xaano Junta madaarate daga olu xawira gaadate qixxaabbe noota Sooreessu kulino.
Sidaamu qoqqowi woraddanninna daganni hattono Hawaasi quchumi giddo noo dureeyyenni gamba assinoonniha 105 miiliyoone birranna danunni Gargartote Olnto Ministirera uynoonni.
Olu gawajjo wodaninni huwatte qoqqowu teessaanonna dureeyye hattono wedellu assitino irko mootimma galata shiqishshannota kulinohu Dagate xaadooshshi Sooreessi kalaa Filiphoosi; albilichono daga togoota gobba gatisate woshshattora dawaro qoltanni mootimmate qoteho urrite diinu faninonke ola buluushshate baalunku qixxaawa noonke yino.
Diinu soqqamaasine gobbate giddono ikko gobbaannino noota daga huwatte tenne hunote wolqansa giwatenninna wirro higgannokki gede assate olu xawi geehshsano gaadate kakka’anni konne noo dagano qooxeessansa seekkite agadha noonsata qaagiissino.
Daga hunote wolqa Itophiya diigate assitanni noo xagarro seekkite huwatte diina galchate “Ninke hee`neenna gobbanke didiigantanno” yite Xaphoomu Ministirichi faale harunsatenni assitanni noo kakkaooshshi addintanni dhaggeeffantanniha ikkino daafira xaano diina buluushshina geeshsha kaajjillunni irko assanna gaada noonke yino.
Sidaamu Qoqqowu umi doychonni 10 miiliyoone layinki doychonni 45 miiliyoone Gargartote olantoranna Juntu olinni darante noo dagara irko asse sainoti qaangannite.
Bakkalcho Bocaasa 23/ 2014
