Amsaalu Felleqe
Ameeriku amaale mini miila ikkitinoti seenaatere Sheela Jakseniti Itophiyu qansootinna ilama hattono Itophiyu baxillaano Ameerikaho Hiwusten Teklsaasi harissinohu ‘’No More’’ millimmo giwate diri aana leelte Itophiyu waatira ikkitannota buuxissino.
Senaateritte dira harinsi yannara assitino hasaawinni; dimokiraasete doogonni doorantinoti Itophiyu mootimmanna Itophiyu qansooti ledo halantannota qaale e’ino.
Itophiyu qansooti gobbansa hajora anga worate assinanni hee’noonni xiiwo giwate harissino dira karsantinoti seenaateritte; cancishaano HWHT gobba diigate xawoho coyidhe gobbate aana ola faninota anfanni hee’neenna Ameeriku mootimmanna wolootuno cancishaano irkisansa gara ikkitinokkita dira harissinori huuro Ameeriku amaale mine macciishshiishshannotano buuxissino.
Itophiyu koliddu Afriku manni budinna balchoomi mereersha ikkitinota afa hasiissannota coyidhinoti seenaater Sheela; Adiwu qeelle Afriku mannira mayyaatero hasaawisenni qaagiissitino.
Konni garinni Itophiyu qansootinna ilama xaa geeshsha harissino diri aana leeltinoti seenaater Sheela Jaaksen kongiresete miillanni mitticho ikkitukkinni digattano yinoonni.
‘’Xaphoomu Ministircha Abiy Ahmediha biilloonyunni kayinse reekkote mootimma safate assinanni hee’noonni wo’naalsha tiyyi’re giweemma’’ yitinoti kayinni wolenti Ameeriku Kongirese miila ikkitinoti Kaaren Baasite.
Kaaren Baasi dagoomitte mashalaqqe qoolisera fushshitino xawishshi garinni; cancishaano HWHTnna Shene gaamonna wolootuno hettisamaano wolquwanni assinanni hee’noonni xiiwonna waajjishiishsha adhitannokkita xawissino.
Bakkalcho Bocaasa 16 / 2014
