Qiddist Gezaheny
Addis Ababa:- Galchimi Oomo, Benchi Shekko, Kafu, Dawuro, Shekku daganna Konta addi woradi haaro Wodiidi Galchimi Itophiyi 11ki qoqqowo ikke faajjetenni safamino.
Kafu Zoone mootimmate xaadooshshi hajubba biddishshi sooreessi kalaa Mesfin Tesfayehu Itophiyu Pireesete Uurrinshara xawisino garinni; haaru Wodiidi Galchimi Itophiyi qoqqowi wolootu Itophiyu daganna dagoominni ledote 13 giddo noo daganna dagooma roduuwimmatenni hanqafino qoqqowooti yino.
Haaru qoqqowi layinki pirezidaante ikke mootoo’minohu Dr Injiner Negaash Waageeshshohu xawisanni; sai gashshooti giddo iillitinoti gashshootu amanyooti hiiqqamme gawajjitinose gobba gatisa baaluri aleenni balaxo uynanni hajooti.
Mootimma cancishaano HWHT gaamo iillishshinotanna iillishshanni noo gawajjonna gobba diigate assoote galchate gutu sharro assa agarantanno yaanni amaalete mini miillaranna qoqqowo saffu miillara qummeessino.
Daga Itophiyanna Itophiyimma agarsiisate wole yannanni aleenni murci’raancho ikka hasiissannonsata huwachishino.
Gobboomu mittimma agarsiisate assinanni sharro kaa’linanni haanju latishshi miinja kaajjinshe loosatenni hattono loosidhe galtinori mini giddo horonsi’ratenni sa’e miinju latishshi horonsi’raanchimmara tiro noo garinni loosa agarantannonsata xawisino. Loosidhe galtino daga irkisatenni safote latishshi handaari aana illacha tunge loosa agarantannota huwachishinno.
Rosu handaarinni isilanchimma agarsiisatenni hattono fayyimmate handaarira illacha tugatenni fayyimmansa agarantino daga kalaqate qinaawino looso loonsannita xawisino.
Meentonna wedella horonsi’raano assatenna eote buicho lossidhanno gede hajo la’annonsari irko hasiisannota huwachishinnohu layinki Pirezidaantichi; babbaxxitinore quchumu mereershuwa lossate loosi aana illacha tunge loonsannita coyi’rino.
Haaru Wodiidi Galchimi Itophiyi amaale mini kalaa Wondimmu Kurtaha qara songaaficha hattono dukko Gennet Mangashita layinki songaafitte asse mootoonsino.
Aanteteno qoqqowo dagoomittetenni, miinjunninna poletiku latishshi handaarinni irkisatenni sufisiisannota xawisino.
Haaru qoqqowi gobbanke miinji badhete miqichonna ayimmanke xawishsha ikkino Buni qoqqowoho Kafu Zoonera afamannowa hattono Konta Dawuro qooxeessira gatamarranniti haaro Koyshu Pirojekte afantannowaati.
Hattono daa’’atote base, Culka lede babbaxxitino shiilonna dubbu afamannowa ikkasi xawisino.
Bakkalcho Bocaasa 16 / 2014
