Yaareed Geetaachew
Addis Ababa:- Odeessaanchu Tafarri Qeenfatohu olu basera gaadate qixxaawinota Itophiyu Pireesete Uurrinsha ledo bilbilunni assino hasaawinni xawisino.
Cancishaano HWHT albaanni gobba massaggu yannara Itophiyu daga aana barshe loossanni keeshshitinota xawisinohu Odeessaanchu Tafarri; xaano uminsa gashshitino gobba kaadde diingeemmo yite gobbaydi diinna ledo halante ola fantinonke yino.
Cancishaanchu HWHT gaamo Sidaamu daga aanano baxxino garinni hilo loossanni keeshshiteenna dagate sharronni gobbankera soorro daggu kawa biilloonyinsanni ka’inori hunote gaamo dubboho maaxantinowa heedhe dhaggete diinna ledo halante Itophiya diigate assitanni noo wo’naalsha sharramate olu base geeshsha gaadate qixxaawinota coyi’rino.
Konni garinni gobbate massagaanchi Ahimedihu sayisino woshshattonni saeemmo yinohu Tafarri Qeenfatohu, “HWHT Wirro Higa Jibbaataho; Sidaanu ejjeettimmanna bareende kolishshu wayi kawita calla dikkitino’’ yaanni Xawisino.
Konnirano albi ejjeettonke leellishshinonke bareendenni ninkeno gobbanke hiikkonni diininnino gatisate gobbate qaccetenni qaccete geeshsha diina sharramme bulleessatenni gobbate ayirrinye agarsiisa annimma noonke yino.
Tini yanna gobbanke jawa jifo giddo noota ikkasenni gobbate massagaanchi olu base geeshsha gaadatenni gobba gatisate sharramanna ani ofolle laeemmori dino yinohu odeessaanchu; gobba diinunni gargarate xaphoomu ministirchi assino woshshatto maahoyye yee adhatenni gobbate hasiisannoha qansichimmate qeecha fulate kakkainota qummi assino.
Sidaamu daga umise umose gashshate seeda dirrara sharrantanni keeshshitinoha ikkanna saihu HWHT (IHADG) gashshooti yannara kayinni dagate xa’mora garunni dawaro qola giwate dagate xa’mo fugatenni sa’e lowo manna shitanni, usurtanni, gobbansa agurte hadhanno gede horritanni sa’ino gaamo ikkansano buuxisino.
HWHT junti Ameerikunna wolootu galchimi gobbuwanni soqqame gobbanke diigate hede fanino ola ikkasinni gobbanke ayirrinye ayeerano sayinse uyneemmokkire ikkankenni; olu roduuwu mereerooti yinanni kaphunni dudumbannire agurre; olu diinnanke ledo ikkinota seekkine anfe mittimmatenni sharrama hasiissannotano yino.
Olu basera gaada dandiitannori, gaadde gobba gatissannonna dandiitannokkiri kayinni noowa heedhe hasiissanno irko assatenni gaadaanote hale ikkitara kawaanni qole sokkasi saysino.
Odeessaanchu Tafarri Qeenfatohu sharrote karsamannota buuxisi yanna geeshsha Sidaamu Qoqqowi loosu kaayyo kalaqatenna Ogimmate biirora dagate xaadooshshi dayiriktere ikke owaatanni afamannoho.
Bakkalcho Bocaasa 16 / 2014
