Amsaalu Felleqe
‘’No More!’’; Afrikaho ikko wolootu kalqenke qooxeessuwara lophitinokki gobbuwa balaxxe lophote deerrira iillitino yinanni waajjuullinni seeda dirrara kadote gashshooti hundaanni ikkite keeshshitu yannara Itophiyu gobbanke kayinni tenne hedonni duucha yannara wo’naalsha assitino gobbuwara anga aa giwatenni techo geeshsha wolambinatese agarsiisidhe keeshshitino.
Ikkollana Itophiya yinanni gobba mayra ninkera angase aa gibbe heedhanno yitannori galchimi gobbuwa techono gobbanke babbaxxitino doogonni ayirrinyese shollishatenna angase qiqqishshe gashshate jawa wo’naalsha assitanni afantanno.
Gobbanke soorro daggu kawano gobbaydi xiiwo roorenkanni lexxitanni hadhurono soorrote massagaanonna daganke kayinni xaano diinnate angansa diuytino. Konni kaiminni gobbate giddo noo daganke calla ikkitukkinni babbaxxitino kalqenke gobbuwara heedhanno qansootinkenna Itophiyu baxillaano xaa yannara kado ikkitonkena ‘’No More’’ yitanni keeru dira harissanni afantanno.
‘’Ledama bebbeehamate huxxa diigatenni mittimmate widira daate. Sa’u 3 dirrara assinoommohu qooxeessu mittimma kaajjishate wo’naalshi daga mimmitu ledo noonsa xaadooshshi kaajjanno gede assinoonni. Ledante halaaleho uurritinori Itophiyu qansootiranna Afriku buudi Diyaapori naandannire ikkansa xawiseemmo. Ikkino!’’ yaanni IFDR Xaphoomu Ministirchi xaa yannara kadote gashshoote Itophiyu qansooti calla ikkitukkinni wo’munku Afriku manni tiyyidhe giwatenni sharramanna wolambinatensa buuxisi’ra hasiissannota huwachishino.
#NoMore’’ Wodoodi Afrikira Ameeriku mootimmanna mite mite galchimi gobbuwa Itophiyu aana kalaqqanni noo xiiwo giwate dira Ameerikahono Waashington, NewYork, Atlaantahonna Wodiidi Afrikira heedhannori Itophiyu qansootinna baxillaano
babbaxxitino qooxeessuwara qansootanke calla ikkitukkinni wolootuno Itophiyu baxillaanonna Ameeriku amaale mini miillano gobbansa mootimma assooti garimale ikkinotanna Itophiyu waatira uurritannota dira harissino qansooti ledo ikkatenni noonsa hedo duudhe wortino.
Kalqenkera shoolente raggara afantannori Itophiyu qansooti mite mite galchimi gobbuwa miidiyubbansa horonsidhanni gobbate giddonnino kaadaano diinna ledo halante gobbankeha dancha hunatenna soorrote mootimma aana hasiisannokki garinni xiiwo kalanqanni gede wo’naaltanni afantanno.
Kuni assootinsa cancishaano HWHT ledo halamatenni sa’u 27nna hakkuy ale ikkitanno dirrara gobbanke diigate mimmitu ledo e’ino sheemaati noonsahura konne gumulate amaddino mixo garimale ikkitinohura togoonni ayirrado gobba diiga dandiinannikkitanna huwachishanno diraati qansootu harissanni afantannohu.
Tini odoo qinaabbu yanna geeshshano gobbaydi gobbuwara heedhannori Itophiyu qansootinna gobbanke baxillaano Ameeriku mootimmanna mite mite galchimi gobbuwa gobbanke aana hasiisannokki garinni angansa worate xiiwo assitannota giwate dira 27 ikkitanno gobbuwara harissino.
Galchimi gobbuwa cancishaano HWHT kaa’late Ameerikaanenniha CNN lendanna BBC, Al-Jazeera, hattono woloottu kalqoomu tuqu xaadooshshuwa horonsi’ratenni kaphu duduwo kalaqqe fincitanni gobbanke mootimma aana jawa xiiwo kalaqate wo’naaltanni afantanno.
Kuri cancishaano irkissanno gobbuwa nookkire kalaqqanni kaphitanni noota kalqe affinohano ikkiro kayinni gobbanke amaddino halaali fulannoti yanna noohura qansootu noowa heedhe gobbansa diinunni gargarate assitanni noo sharro jawaatanna naandannita ikkitinotano gobbanke mootimma xawissanni afantanno.
‘’No More’’
Bakkalcho Bocaasa 16 / 2014
