Qiddist Gezaheny
Addis Ababa:- Xaphoomu Ministrchi Dr Abiy Ahmedihu Itophiyu dagaranna wo’mante kolidda dagara saysino woshshattonna muro dhaggennitenna yannase agadhitinote yino dhaggete xiinxallaanchi Pirofeeser Laaphiso Gedelleebohu.
Pirofeeser Laaphiso Gedelleebohu Itophiyu Pireesete Uurrinshara xawisino garinni; Xaphoomu Ministrchi Abiy Ahimedihu cancishaano HWHT gaamo ledo hananfoonni ola lainohunni wo’mante Itophiyu dagara lawishsha ikkatenna basete geeshsha mare olamate mudhasi dhaggete ofolla dandiitanno sokkaati yino.
Xiinxallaanchu xawishshi garinni; Itophiyu xaa yannara Adiwu ledo heewisiisa dandiinanni oli giddo nooha ikkanna konneno gobbaydi koliddu diina ikkitinori Awuroppu gobbuwa; giddoonni kayinni wo’mante Itophiyu daga diina ikkitino cancishaano HWHT ledo hananfoommoha gobba gatisate gaado lainohunni xaphoomu ministrchi yannasi agadhino hasaawa assino.
‘’Albankeenni danqarantino mitiimma qeelle gobba sufisiisate widoonni massagaano togoo hasaawa assanna dagansa konni aleenni kakkaysa hasiissannonsa’’ yinohu Pirofeeser Laaphiso; Adiwu qeelle yannara Miniliki daga kakkaysatenna dagano badheenni hale ikkite harunsitanno gede tenne qummeessino yaanni hedosi xawisanno.
Ledoteno HWHT cancishaano gaamo gobbaydi gobbuwa riqibbe olantanni nooha ikkanna Itophiyu kayinni rossinonte gede kolidda daga wolapho qolsiisate kolidda riqibbe olantanni no yino.
Xaphoomu Ministrchi Pan- Afrikaanizimete macciishshammenni wo’manti kolidda daga Itophiyu qote uurritona yinohu olu Itophiyu callunniha ikkinokkita leellishasinniiti yino.
Itophiyu Adwaho borreessiissino qeellenni kalqete afantannori koliddu daga naaxxitannonte gede Awuroppu gobbuwa giddoydi diinna horonsidhe Itophiyu umo heeshshi assanno looso loossanno woyte kayinni albaanni higge yekkeerantaseranna ayirrinyese agarsiisate loossasera hasiisanno yino.
Pirofeeser Laaphiso hasaawisinni; Ameerikunna wolootu iso labbannori wo’manta kolidda daga kadote gashshoote irkidhe borojju daddalinni wolqansa horonsidhanni heedhinotanna xaa geeshsha Dimokraasetenna kaa’looshshu su’minni jironsa bebbeeqqitanni heedhinota dhagge kultanno.
Xaa yannara gobba e’ino mitiimmanni fushshate Xaphoomu Ministrcha harunsa hasiissannotanna wedelluno ikko gattinori Itophiyu qansooti massagaanchonsa harunsite gobbansa diigara dayno diininni gatisa hasiissanno yaanni Pirofeeser Laaphiso sokkasi saysino.
Bakkalcho Bocaasa 16 / 2014
