Amsaalu Felleqe
Addis Ababa;- ‘’Itophiya’’ yaannoha wolambinatu su’ma agarsiisate dhaggete eeggo noonke’’; konnirano, ‘’Pan Afriku Macciishshammenni Koliddu Daga Baalanti Itophiyu Waatira Uurritinara Woshshatto’ya Shiqisheemmo’ne!’’ yino IFDR Olu Wolquwa xaphishshu hajajaanchi Xaphoomu Ministirchi Abiy Ahmedihu.
Konni gedensaanni ofollinoommowa hee’ne gobbate daafira hasaanbeemmo yanna di-ikkitino; assa noonkeri ninke uminkenni gaada calla hasiissannonke; Itophiyaho ninkera aleenni hiikkiinnino daye kaa’lannosehu dino yaanniiti coyi’rinohu.
Itophiya yaannohu wolambinatu su’mi mundeete waaga baantoonniho; bareedda kakkalantinosiho; bi’reno ikko techono mitti mittinke hasatto; duuchinke lubbo Itophiyu woroonniiti; ninke hee’neenna Itophiyu reyitankunni ninke reyneenna Itophiyu heedhara hasi’neemmo yaanniiti coyi’rinohu.
Itophiyu halchishshanno gobbaati; be’ronni ga’a Itophiyi bayi’ra ikkitannohura xaaddinose jiffa qeeltanni sa’’a hundanni noose dandooti; yinohu Olu wolquwa xaphishshu hajajaanchinna xaphoomu ministirchi Abiy Ahmedihu; tini sharro wo’manti koliddu daga sharrooti; Itophiya guluphisiisatenni kolidda daga saalsiisatenna
haaru garinni kadote gashshootinsa qambara haxote worate ikkinohura duuchinke mittimmatenni sharrammo yaanni sokkasi saysino.
Koliddu daga ayirrinyinna jawimmara yitine; Pan Afriku tii’’inni duuchunku koliddu daga Itophiyu ledo halantine waatisera uurritinanni gede woshshatto’ya shiqisheemmo yino.
Tini sharro duuchunku Itophiyu manni sharrooti; oosonkera gobba heedhannonsa gede assinanni sharrooti. Oosonke ayirrinyenna wolambinatensa uddidhe kalqete albaanni haxonsa gotti yite hadhanno gede assinanni sharrootino yaanni egensiisino.
Bakkalcho Bocaasa 16 / 2014
