Qiddist Gezaheny
Addis Ababa:- Tenne lamalata Amnesty Internashinaali rippoorte harunsite kalqete dagoomi cancishaancho HWHT ola Amaaru qoqqowira Nifas Mewucu qooxeessira iillishshino gawajjonni xa’mamaano ikkitanno gede xiiwo assa hasiissannota maccahu poletiku manchi kalaa Leenco Leta xawisi.
Egennaminohu Oromote poletiku manchi kalaa Leenco Leta Aliyye gobbate qooxeessira cancishaanchu HWHT kakkayishshinni hanafamino ola harunsite iillitino reyo, mulqamanna gaamotenni seenne siyatate jaddo buuxatenni Amnesty Internashinaali shiqishshino rippoorte Itophiyu pireesete uurrinshara xawisino garinni; cancishaano gaamo iillishshino gawajjonni xa’mamaano ikkitanno gede kalqete dagoomi xiiwo assa hasiissannonsa. Xiiwo calla ikkitukkinni hasiissanno irko assa noonsa yino.
Kalaa Leenco xawishshi garinni; olu yannara gaamotenni seenne siyata kalqoomunna Itophiyu seerinni xa’misiisanno assooteeti; Maganunna mannu oosowano saalfachishannoho.
Cancishaano gaamo konne dadillisanno assoote iillishansa dagate aana noonsata kakkachimmate takko leellishannoha ikkasinni Itophiyu daganna dagoomi assoote mittimmatenni giwatenni Amnesty Internashinaali rippoorte kaima assatenni
mootimma cancishaano gaamo iillishshino jaddo bikkinni xa’mamaano assitanno gede xiiwo kalaqa noonsa yino. Tenne aana mootimma garunni yawonsa fula hasiissannonsatano xawisino.
Amnesty Internashinaal qaru borreessaanchi Agnes Kalamedi; HWHT qodhaano Amaaru qoqqowira Nifas Mewucu quchumira qansootu aana iillishshino gano olu jaddonni xa’misiissansara dandiitanno mannimmate aana iillinshoonni jaddooti. Mannihimmate aana iillinshoonni ganonni hunaanote aana qaafo adha hasiissanno yino.
Qaru borreessaanchi xawishshi garinni; cancishaano HWHT gaamo kalqoomu seera xiiwatenni mannimmate qoosso aana iillishshanni noota bisunna gadachishshe siyatate jaddo uurrisa hasiissannonsatano huwachishino.
Bakkalcho Bocaasa 9 / 2014
