Qiddist Gezaheny
Addis Ababa:- Cancishaancho HWHT hunate assinoonni woshshattora Wodiidi qoqqowi teessaano luphiima macciishshammenni dawaro qoltanni afantannota Wodiidi qoqqowi mootimmate woshshamaanchi kalaa Xilahun kebbedehu xawisi.
Kalaa Xilahuni xawishshi garinni; wodiidi qoqqowira gobba gatisate gaadi woshshatto assini yannanni hanaffe daga luphiima macciishshammenni gargarooshshu olanto hale ikkatenni aleenni oosichonsanna gargarooshshu olanto karsantanno gede assitanni afantanno.
Ledoteno gargarooshshu olantora irko ikkannoha lame lamala giddo 382 Miliyoone ikkannoha woxunna danu kaa’looshshe gamba assa dandiinoonni. Gobba gatisate gaadi woshshatto adhatenni meessi sinqinninna hayyonni olu base gaada noonke yite luphiimu kakkaooshshe kalanqe qinaabbino olanto olu base geegiissinoonni yino kalaa Xilahuni.
Itophiyu olamanni noohu cancishaano HWHT ledo calla ikkikkinni mite mite xawo ikkitinokki sokko noonsa gobbaydi wolquwa ledooti. Gobbaydi wolquwa xawonna xawo ikkinokki garinni Itophiyu aana harissannoha xawo ikkino gaado gargadhate dagate millimmo assinanni hee’noonnitano lede xawisino. .
Gobba diigate sokko amadde ola fantinori HWHT soqqamaanonsa qoqqowubba eessatenni qoqqowu giddo noo zoonnaranna baxxitino woraddara gaancenna canco kalaqqannokki gede dagoomu qooxeessasi seekke agadhanni no yinohu kalaa Xilahuni; Oneg Shene labbinori HWHT jaalla assoote gargadhate daga murcidhe ka’inota coyi’rino.
Wodiidi qoqqowira babbaxxitino quchummanna baadiyyete qooxeessubbara cancishaano gaamo assoote hedotennino ikko uduunnunni irkissannore qooxeessu teesaano xawo fushshitanni nootanna cancishaanote gaamo miilla ikkatenni keeraancho millimmo booreessate millissanno bissa bande mootimmate shiqishatenni daga luphiima qeecha fultanni afantannota coyi’rino.
Olu uduunne borreessiisate widoonnino qoqqowoho hee’ranno yine hendanni kiironni xaa geeshsha borreessamino olu uduunni kiiro lowo geeshsha ajjinoha ikkasenni borreessinanni yanna mitte lamara alba higge seeddanno gede assinoonni. Konnira qoteho qoqqowoho luphiima kiiro noo Xexxerrisi hee’rasi ledo amadaminohunni jaddoteno; wole owaanterano hosara dandaannohura borreessinanni hee’noonnita coyi’rino.
Bakkalcho Bocaasa 9 / 2014
