Qiddist Gezaheny
Itophiyu AGOA sumiimme gobbaanni ikkiro looso uurrissannoti woy cufantanno paarke diheedhanno yino Hawaasi Industirete Paarke qaru loosu harisaanchi kalaa Fitsum Katamihu. Qaru loosu harisaanchi Ameeriku Itophiya AGOA sumiimme gobbaanni assate saysino hedo lainohunni Itophiyu Pireesete Uurrinsha ledo hasaawa assino.
Paarkennihu qaru loosu harisaanchi kalaa Fitsum Katamihu baxxinohunni Bakkalcho Gaazeexi ledo assino hasaawinni; AGOA sumiimme uytannonketi baxxitino horo Ameerika sonkanni uduunne qaraxiweelo sonkeemmo gede kaa’la ikkinota kayse; Ameeriku uynoti qorophishshunna qixxaawote yanna gooffeenna miteekkite gobba AGOA sumiimmenni fultannoha ikkiro konninni looso uurrisse cufantannoti mitte Paarkeno di heedhanno yino.
Kalaa Fitsumi ledotenni; AGOA sumiimme kayinsiha ikkiro Hawaasi Industirete Paarkeno ikkito wolootu uduunnunna hoccootu laalchi aana bobbakkino uurrinshuwa laalchonsa co’ontanni Ameerika soqqa di dandiitanno yaa ikkikkinni laashshaano laalchonsa qaraxo murtanni gobbara soya dandiitannotanna laynkihunni dureeyye laalchonsa wole gobbuwa qolte soya dandiitannota xawisino. konninnino dikko hasi’rate loosi umonsa dureeyye la’’annoha ikkasi coyi’rino.
AGOA sumiimme ka’uro gawajjamannohu Itophiya calla ikkikkinni laashshaano gobbaydi gobbuwano ikkansa xawisinohu qaru loosu gumulshaanchi; dureeyye gawajjantannohu laalchonsa gobbara soyate qaraxo murtanno woyte afidhanno horo ajasenni ikkinota kayse; gobbano afidhannoti gobbaydi soorro hakko bikkinni dirritannota xawisino.
Konni daafira AGOA sumiimme ka’’ase harunsite kalaqantannota miinju gawajjo duqqatenna tirote hedo abbate dureeyyeno ikkito mootimma yanna xa’mannohunna jawa xiinxallo hasi’ranno loosi agaramannonsata qummi assinohu kalaa Fitsumi; baxxinohunni laashshaano dikko hasa, noo dikko aana fulonsa ajishshe ma garinni horonsi’raano ikka dandiitannoro hattono Ameeriku dikkono mootimma irkissansara hasidhanno gari hee’riro hattenne xiinxallotenninna egennotenni qola hasiissannota huwachishinno. Konne assateno mootimma illacha tugge loossanni afantannoha ikkanna doorshu doogonna furcho kalaqantanno yee ammanannota kalaa Fitsumi egensiisino.
Paarkete giddo kummatenni kiirranniri loosu kaayyo kalaqantinnonsa qansooti afantannota qummi assinohu kalaa Fitsumi; AGOA sumiimma ka’uha nafa ikkiro loosisinni gufisamannohu mittu loosaasinchi hee’rannokkita duu’re xawisino. ikkollana loosama hasiissannohu batinyu loosi agarannota huwachishinno.
Hawaasi Industrete paarkeno ikkito wolootu industrete paarkuwa gobbaydi dureeyye goshooshateno ikko egennote reekko abbate hattono loosu bude gatamarate luphiima qeecha fultanni afantanno yinohu qaru loosu harisaanchi; konni daafira ninke mixo Hawaasi Industrete paarke Itophiyaho calla ikkikkinni Afrikaho lawishsha ikkitannota macca Paarke assate yino.
Ameeriku sa’u lamala giddo Itophiya lede Sase gobbuwa AGOA sumiimme gobbaanni assate hedo saysinoti qaangannite.
Bakkalcho Bocaasa 9 / 2014
