Abebech Maatewoos
Addis Ababa:- Cancishaano gaamo billoonye amaddeenna gobba heedhanno yee hedannohu Itophiyu qansichi hee`riro fayyaaleessa di ikkino yino rosu ministrchi piroofeeser Birhaanu Neggihu.
Rosu ministerenna IZEEMA paarte massagaanchi piroofeeser Birhaanu Neggihu “gobbayidi gobbuwa mereero e“a, giddoyidi mittimmanni” yaanno uminni EBC “Qey mesmeri” qixxaawo ledo hasaawa assi yannara coyi`rino garinni; cancishaano gaamo billoonye amadeenna gobba heedhannoe yee hedannohu Itophiyu qansichi hee`riro fayyaaleessa di ikkino yino.
Piroofeeser Birhaanu xawishshi garinni: cancishaano gaamo dagguro nafa daggannohu gobba diigateeti. Cancishaanote daa qansoota gobbiweelo gatissanno. Gobba hoogguro jajjuno heeshshono mullareeti. Dureeyye ayee woyte sodhannohu yanna baala dagganno mootimma woxinsanni hidhitanni hee`ra dandiitannoha lawannonsahuraati.
Tini gaamo bashsho mulqitinnohunni aleenni hiitto assite Itophiyu daga mulqa dandiitannoro xaanni hanaffe heddanni no. Mulqansannino aleenni gaamo gobba diigate murcidhe ka`inore ikkansanni gobba hoogguro jajjunna heeshsho heedhannokkita anfe tenne gaamo dandiinummo bikkinni qeela baalinke yawo ikkitara hasiissannota huwachishino.
Itophiyu daga huwata hasiissannosehu xaadinonke baarigaari buqqeete kaajjilli noosikkinna hakkunni bikkinni keenne olammeemmoha dikkino yiinohu minisitrchu; Tigraayete qaaqquulle, geerranna olu uduunne amaddinokki manna albaanni dirte olantanni noota buuxisiisino.
Cancishaano gaamo moortanni hee`ra dandiituro Tigrayete daga gooffurono badhera higgannokki bunshete polotiki wolqa ikkansanni shaqqishenna dogisiise keeraa`mitino doogo widira e“anno yaa mitiinsannoha ikkasi xawisino.
Bakkalcho Bocaasa 9 / 2014
