Abrahaam Saamueel
Hawaasa:- Sidaamu Dagoomi Qoqqowi giddo wiinamu yanna lallawi wodho sa’ino yine hulullammoonni mannoota seeru hundaanni assinoonnita Sidaamu Dagoomi Qoqqowi Keerunna Gallabbote Biiro egensiissu.
Biiro Sooreessi Kalaa Alemaayyo Ximootiwosihu baxxinohunni Itophiyu pireesete uurrinsha Bakkalcho gaazeexi ledo assino hasaawinni xawisino garinni; Sidaamu Qoqqowi Pirezidaantichinni massagantanno qara komaandi poste uurrinse looso hanafinkunni kaajjado looso loonsanni hee`noonnita qaagiisse, assinoonni qorqorshinni wiinamu yanna lallawi wodho sa`ino mannoota seeru hundaanni qolloonnita xawisino.
Seeru hundaanni assinoonni huluullamaano giddo Tigirayete jaddaasine calla ikkitukkinni wolootu daga ilamano noota qummi assino.
Wiinamu yanna lallawa sa’ini huluullamaano anga minensa hedeweelcho buuxo assine amandoonniri giddo 27 shugguxe, 3 boomba, shole, saanjanna addi addi gargartote olanto, federaalete poolisenna qoqqowubbannita addi wolqa uddano ledo amandoonnita xawisino.
Seeru hundaanni assinoonni manni giddo 17 manni assinoonni buuxonni qarru nookkire ikkitinohura usuru mininni fultanno gede qara komaandi poste gumulo sayissinota kulinohu Kalaa Alemaayyo; wolootu kayinni jawa jaddo loossinore ikkitino daafira lende buuxo assinanni hee`noonita xawisino.
Huluullamme seeru hundaanni assinoonni manni giddo mitu Tigirayete ola massagginnori noota xawise; gamu qolte qoqqowu giddo jaddo loosate sokko adhite millissanna amandonniri albi gargartote olantono no yino.
Sidaamu qoqqowi giddo uurrinsoonniti qara komaandi poste hundaanni 5 kilaasterenni tantannoonniti gaamo noota kule; Hawaasi, Shabbadiini, Yirgaalamete, Aleta Wondonna Bansa Daayye kilaastere gobbate gargartote olanto, Federaalete poolise, qoqqowunniti addi wolqa hattono gobbate mashalaqqenna deehininnetete Biiro ledo tantanne loonsoonni loosinni kaajadu gumi leellanni noota buuxisino.
Kommaande poste mitu mitu qachira ga`labbote qarri xaadara dandaanno yite assitino gambooshshinni addi addi gumulo sayissinotano qumi assino. Sayinsooni gumulo giddo lame lekka xexxerrisi hashshihunni 1:00 saate gedenoonni, shoole lekka kaameeli baajajetenni luphi yaannohu kayinni 2:00 saate gedenoonni millisa dandiitannokki gede assinoonitano kalaa Alemaayyo lede xawisino. xawisino.
Wole widoonni, dagate hodhishshu owaante uytanno kaameella hashshihunni 2:00 saate gedenoonni millisa dandiitannokkitanna tini gumulo be’ro barrinni hanaffe loosu aana hossinota komaandi poste gumulo sayissinota sooreessu qummi asse; konne harunsine qoqqowu giddora e’anni fultanno bissanna kaameellate aana kaajjado qorqorsha assinannitano buuxisino.
Olluu qoqqowubba ledono miteenni halamme loosate sheemaate e`noonnita xawisinohu sooreessu; gawalonna dannu nookkiha sasenti qoqqowubba giddora e`ne kaajjado looso loonsanni mashalaqqeno soorri`nanni Juntu mitte foonqe afi`re gawajjo iillishannokki gede assinanni hee`noommo yino.
Kalaa Alemaayyo xawishshi garinni Itophiya billaalisate guraano ikko qiniiteenni millissanni noori hunote wolquwa cancishaano Onegi Shanenna HWHT eate horoonsidhanno furcho olantote bissa ledo halamme 24 saate barxa yine mannu goxe kaeenna daggurono qaafo adhate qophaanbe hee`noomo yino.
Xaa geeshsha keere baxxanno daganke ledo ikkine kaajjado looso loosatenni jawu gumi borreesaminota kulinohu Sooreessu; xaano ikkiro daganke huluullantannori hee’riro baatooshshu nookki bilbiilinni mashalaqqenna qumeessa uytannonke gede telekomunikeeshinete ledo halamme loonsanni hee`noommo yino.
Hunote wolqa Sirchonna gosa gosanniwa badde gawajjonna jaddo iillishanokki gede assate uurrinsoonniti qara Komaandi poste eela dirrite loossanni nootanna baxxinori hee`riro qaafo adhate hashsha barra harunsitanno komite noohura xaa geeshsha xaadinori mittu qarri nookkita Alemaayyo xawisino.
Olantote giddono busha akata afi`rinohu daga gawajjaranna umisi horo shorrannohu ba”annokki daafira, insa giddono togoori xaadiro qaafo adhate deerru deerrunku noo komite ledo hashshi yannara keeno assinanni loonsanninna harunsinanni hee`nonni yino.
Bakkalcho Bocaasa 9 / 2014
