Amsaalu Felleqe
Addis Ababa;- Gobbaydiri tuqu xaadooshshuwa Itophiya lainohunni kaphunni odeessitanni noori jajjabba kalqoomu tuqu xaadooshshuwa assootino gara ikkinokkita leellishannoho yaanni Hawaasi Yuniversite odeessaanchimmatenna xaadooshshu rosiisaanchi kalaa Belew Annilleyihu xawisi.
Kalaa Belew Annilley Itophiyu Pireesete Uurrinshara xawisino garinni; odeessaanchimmate ogimma mittu widira kaa’litannokkitanna duuchanko taalo ikkino garinni owaatate amanyootunninna halaale fushshate ogimmanni loonsanniha ikkirono galchimi gobbuwa miidiyubba kayinni odeessanchimmate amanyooti nookki garinni Itophiya lainohunni kaphu odoo sayissanni afantanno.
CNN, BBC, AL-Jaziira, France 24, Reuters labbinori kalqoomu miidiyubba uurrinshuwa baca rosu uurrinshuwa yannaasincho odeessaanchimmate rosi golinni lawishshu gede adhinannire ikkitinota kulinohu kalaa Belew; xaa yannara Itophiya lainohunni loossanni fincitannohu kaphu odoo kaiminni baca bissa uurrinshuwa assootinsanni qorophitannonna loosonsa layidhanno gede assitanni noota qummi assino.
Galchimi gobbuwa tuqu xaadooshshuwa qinaawino garinni Itophiya lainohunni tuqissanni noohu kaphu duduwi HWHT 27 dirrara laafanna insara soqqantanno mootimma ikkase xawoho leellishinoho yee; konni garinnino cancishaano gaamo reyte buko ulattanni noowinni kayisse wirro insara soqqantannonsa gede assate dodantanni noota rosiisaanchu lede xawisino.
Kuri galchimi gobbuwa tuqu xaadooshshuwa massagaanonsa sokko gumulsiisate kaphu mashalaqqe fincatenninna gobbanke su’ma hunate goxxukkinni galte loossanni no. Odeessaanchimmate rosi halaalaanchimma, taalonna gara ikkinore finca, ammanamooshshunni loosanno handaaraati yine insa lawishshu gede adhinannireetinkanni. Ikkollana xaa yannaar Itophiya lainohunni addinta saalfachishannore ikkasi kuri tuqu xaadooshshuwa halaale odeessitannokkirenna yiiyye yinire calla yitanni heedhannore ikkansa xawoho buuxisino yinohu rosiisaanchu miidiyubba poletiku sokko calla adhite gumulsiissannore ikkansano leellishshino yino.
Odeessaanchimmate rosiisaanchi xawishshi garinni; gobbaydi wolquwa Itophiyu aana xiiwo kalaqqanni noohu insa hasidhino gedee mootimma ikkitinokkihura; insara guluphite galtanno mootimma ikkitara noonsa hasatto kaiminni Feesibuuketenna Twiterete qoolla cufatenninna hsidhu qaafo adhitanni no. Konnirano kaphu mashalaqqe duuchunku raginni gawajjose luphiima ikkitinohura Chaynu gede meessiha ikkinoha Feesibuuketenna Twiterete qaficho hasiissannotano qummi assino.
Itophiyu daga galchimi gobbuwa kaphunni fincitanni noo odoo seekkite huwattanni daggino yinohu kalaa Belew; tenne lamara Addis Ababahono ikko duuchante gobbanke qooxeessuwara konne assoote effidhe gibbinota daga harissino dirinni leellishshinotanna kunino gobbuwa kaphinsa xawo fuleenna saalfattanno gede assannonsata xawisino.
Sa’u muli barruwa giddono Addis Ababu cancishaanote qodhaano doyissitino; daga lowonta hembeelantino; yitanni kaphuni odeessiturono mashalaqqe kapho ikkitinota uminsa qansooti gatikkinni Itophiyaho dagge halaalu hiikkaanni nooro coyidhino garaati noohu yino.
Kalaa Belew amadisiiseno; galchimi gobbuwa gobbanke aana kaphunni harissanni noo gaado lainohunni xawo assate gobbate giddo miidiyubba hanaffino loosi gara ikkinota kule; konne halaale babbaxxitino afuubbanni odeessatenni kaphunna hunote assootensa kalqoomu dagoomi afanno gede assano albillicho agarranni loossaati yino.
Bakkalcho Bocaasa 2, 2014
