Qiddist Gezaheny
Hawaasa:- Soodihunni 12 saateeti. Sidaamu Qoqqowinni baalante woraddanninna Hawaasi quchuminni fultino batinye daga gaamo gaamotenni ikkite addi addi sokka xawissanno borro amadde hawaasi kalqoomu xawo higge tintanni no. Hawaasi kalqoomu xawi giddoonni e’nanni woyte ragu baalu babbaxxitino sokka sayissanno borro borreessinoonni woraqattanni barro ikkino. Gaamotenni ikkite du’nantanni noo daga mite lame yitanni dargansa amaddanna shiimu xiqqeessi gedensaanni xawu milli yinanni faro hoogga geeshsha mannunni wo’mi.
Xawo wo’mitino dagano Itophiyu baandeera amadde mitootuno uddidhe hattono woraqataho borreessantino sokka amadde leenqissanni huuronsa gotti assite gobbansara noonsa baxillenna irko hattono hunaano HWHTnna Oneg Sheneha gobba diigate assoote tiyyidhe giwansa addi addi garinni xawisa amaddino. Tenne yannara xawu gobbate jawimmanna baxille xawisanno addi addi sirbinni, qixxaawote massagaano sayissanno sokkanninna dagate huuronni addintanni iibbino.
Xiqqeessu aana xiqqeessu kiiramanna soodihunni Mitte sa’’aate ikki woyte anino umo mitte qacce amade uurre dagate ikkito daa’’atanni keeshshoommawiinni milli yee doyanni dagate ikkito shiqqi yee la’’ate wo’naalumma. Tenne yannara gobbansa aana diinu iillishanni noo assoote giwansa xawisate qiida qiidaho yitukkinni hatte yannanni mininsanni fulte xawoho afantino daga mereerinni wedellichu Temesgen Sefiwuhunna Selaamaawit Musemmiti gobbansa baandeera uddidhe cancishaano HWHT nna Shaneha gobba diigate assoote tiyyidhe giwansa xawisate Hawaasa kalqoomu xawo harinsoonni dira fultino quchumu teesaanooti.
Insano ‘’Itophiya diinu kelleshshanni fushshate mittimmatenni ka’no’’ yaatenni hedonsa xawisa hanaffu. Mitto ikkine Juntu dayno widira qolle shorra hasiissannonke. Insa olantanni noohu horonsaraati; ninke kayinni olamanni hee’noommohu gobbanke gatisateeti yite coyidhanno woyte albinsa aana gaabbonna kakkaooshshu xawe leellanno.
Sidaamu qoqqowinna Hawaasi quchuminni fultino daga gobba diigate kaino diina giwatenna Junta shorrate ko garinni xawo fultino. Tini mittimma wo’munkuri aana sufa noose; Itophiyimma biiffannohuno togoonniiti yitanni coyidhanno. Konnira gobba diinunni amadantannokki gede shaaltino mittimmanke wirro kaajjishi’ne mitte hedo amande Itophiya gatisate gaandeemmo yitanni hedonsa beekkino. Tenne hunaanonna gobbate allaggicho ikkitino gaamo hegerera ka’annokki gede assine waamme Itophiyu keerenna wolambinate buuxisiisate jawiidi eeggo noohu ninke techoo ilama aanaati. Annuwu lubbonsa uyte kakkalante sayisse abbitino gobba techo diinu amadanna worre la’’a dinonke. Baxxinohunni wedellu olu base geeshsha gaande olamatenni gobbanke diinu anganni giggishsha ninkewiinni agarantannote yitanni hasaawisoommansa wedelli hedonsa uytino.
Woluno Juntu assoote giwate dira fultino daga mereerinni Wonde Gennetete woradi teesaancho ikkinohu kalaa Bellexe Tasammihu uyno hedonni;cancishaano HWHTnna Shene gobba diigate assitannore anfanni hee’noommo yaanno. Qeellummo yitanni Amaarunna Affaarete hattono wolootu daganna dagoomi aana iillishshanni noo barshe la’nanni hee’noommo. Insa hasatto Affaaretenna Amaaru daga calla ikkikkinni wo’manka Itophiya hunate. Insa albano ikkiro Xaaliyu Borojjenna giggilo ikkitino daafira loosinsa hundinni hanafe konneeti yaanni tenne hunaano gaamo ko garinni xawisanno.
Alba annuwinke yannaasinchu olu uduunni noonsakki yannara urdetenna wonqotenni Xaaliya guluphisiissinota coyi’rinohu kalaa Bellexe Tasammihu; Xaaliyu gobba amadi yannara isi anni Raas Desta Daamxewuhunna Dejjazmaach Baalcha Abbaanebsohu ledo olame diina daynowa qole shorrino ejjeetto ikkasi hasaawu mereero kayse; Xa ninke afi’noommo olu uduunninni basete geeshsha gaande gobbanke gatinso yaanni lede qaagiissanno. Kuri hunaano wolqa qansootu mittimmatenni fulle higgee ka’annokki gede assine siddonsa huna noonke yaanni hedosi worino.
Hattono wole cancishaanote assoote giwate sokka sayissanno borro amadde dira fultinoti qoqqowu teesaancho dukko Mulu Hayleti uytino hedonni; ‘’Itophiyu ayeeno ikke di diigamanno insa kayinni hegerera diigantanno’’ yaatenni hedose xawissanno woyte albise aana jawu hanqinna gaabbo nabbawantanno.
Bakkalcho Bocaasa 2, 2014
