Addisu Adoola
Addis Ababa: Itophiya diigate halantino wolqa muli barra qasanteennanna ubbeenna Itophiyu baandeeri gotti yeenna la’neemmo yanna muleeti yaatenni IFDR Xaphoomu Ministeerchi Dr Abiy Ahimedihu xawisi.
“Daramaasinetenna gawajjamaanote qote uurrineemmo; gargartote olantonke irkinseemmo!” yaanno massagote qaalinni kaa’lo gamba assate atoomi hari yannara IFDR Xaphoomu Ministeerchi Dr Abiy Ahimedihu xawisino garinni, addi addi bissa Itophiyu daga kaphu duduwinni babbadate batinye sharro assitanni no. Tini mixonsano wo’mitannokki gede mitto ikkatenni leellinsheemmonsa yiino.
Gobbanke duuchu raginni miinju, dippoloomaasetenna miidiyu poropogaandinni hattono baattote aana noo wolqubbara baala kaa’lo assitanno bissa ledante Itopiyu daga daafursate sharro assitanni no. Ikkeennano kuri baala wolqubba Itophiyu daga halantino cigilenni qeelantanno yiinohu Xaphoomu Ministeerchi Dr Abiy, Itophiya diigate halantino wolqa muli barra qasantennanna ubbeenna Itophiyu qole latte baandeeriseno gotti yeenna la’neemmo yanna dagganno yiino.
Itophiyu geeshshita jawa gobba wolambinaatunni keeshshiishate kakkalo kakkalama gadachaho yiino xaphoomu ministeerchi, kakkalo kakkalate woxu noosihu woxisinni, egenno noosihu egennosinni, wolqa noosihu wolqasinni gobbasi agarara hasiisanno. Fannonninke gaado qeelate mittimma uurratenni Itophiya saysa noonke yiino.
Mannootu lubbonsa baatte ninke diiggannoha ikkiro mitti mittinke gobbanke lubbonke baante keeshshiinsheemmono yiinohu Dr Abiy, Daga, olanto, gobbate geerra, meentonna baalanka qineessine haa’noommo keeraancho gobba ilamate sayinseemmo yiino.
Bakkalcho Bocaasa 2 / 2014
