Addisu Adoola
Addis Ababa: Lamalate addi addi gobbanke kifilera ha’rinsoonnihu keerunna irkote diri Itophiyu daga hiittenneno kalqete xiiwora guluphitannokkita ikkitinota leellishshinoha ikkinota Mootimmate xaadooshshi owaante Ministeerchi Dr. Leggese Tulluhu xawisi.
Ministirchu Dr. Leggese Tulluhu, baxxino garinni Itophiyu Pireesete Uurrinshara xawisino garinni; lamalate babbaxxino gobbanke qarqarira ha’rino keeru diri Itophiyu daga hiittenneno kalqete xiiwora guluphitannokkita ikkitinota leellishino.
Lamalate giddo base basente ha’rinsoonnihu keeru irkote diri Itophiyu daga cancishaano HWHTnna Shene gaamoha hunote assootensa hattono gobbaydi tuqu xaadooshshuwa kaphu oduubba effidhe gibbannota ikkitinota xawisino.
Horraancho HWHT gaamo uurrinshaamu olu amuraati gobbaanni ola lallawatenni baxxino garinni Amaarunna Affaarete qoqqowubbara batinye qarqarra horratenni lowo kiiro noo manna gawajjate; mootimmatenna hallanyu jajja mulqi’ratenna diigate aana afantannotano
Ministirchu coyi’re; konne saalsiisanno assoote mikita dandiinannihu waaxantino dagate millimillonni ikkinohura federaaletenna qoqqowubbate mootimma mittimmatenni shiqishshino gaadu woxaratto garinni daga tumo qoltino yino.
Lamalate gobbankera qaccetenni qaccete geeshsha leellino cancishaano gaamonna gobbaydi miidiyubba gobbate giddo hajora angansa worate wo’naaltannota giwate ha’rinsoonihu keeru dirino woxarattotenni afamino guma ikkinotanna hattono dagano tenne gobba gatisate woxarattora tumo qoltinota leellishannoha ikkinota coyi’rino.
Addis Ababahonna addi addi qoqqowubbate quchummara assinoonni keeru diri Itophiyu daga gobbansa hiikkonni dani hunonna qarrinni gatisate halante mikitatenna gargartote olanto irkisate noonsaha jawa kakkaooshshenna macciishshamme hattono olu xawi geeshsha gaadatenni gobbansa hunote wolquwawiinni gatisate noonsata jawa mudhaanchimma leellishannoho.
Hunate dagganno hunaano gaamono dagoomichu dambalinni galchatenni Itophiyu wolambinaate, daganke keeraanchimmanna hattono baalunku qansichi keerunni hee’ranno gobba kalaqate assinanni gaadira qeechansa fulate assinanni millimillo leellishanno irkote dira ikkinota xawisino.
Cancishaano wolquwa hattono babbaxxino daninni assinanni gobbaydi xiiwo giwatennino gobbaanni qara giddoodi mittimmanna halamme ikkitinota leellishannoha ikkinotano Ministirchu coyi’rino.
Kalqete miidiyubba baxxino garinni ‘CNN, BBC, Reuter’s nna labbannori tuqu xaadooshshuwa, qara gede cancishaancho gaamo sokko gumulsiisaano ikkite faajjete soqqantannore ikkitinohura tini dassitino harinshonna miidiyubbate millimillo gara ikkitinokkita leellishatenna konne assootensa gimbete dirinni xawisansa qummeessino.
Jeefoteno Dr Leggese, mootimma tenne irko sufisiisatenna Itophiyu daga hiittenne irkono tantanamino garinni leellishshanno gede loossannohanna dagate hasatto loosu aana hosiissannoha ikkano gede xawisino.
Bakkalcho Bocaasa 2 / 2014
