Abrahaam Saamueel
Addis Ababa:– Itophiyu Mannihimmate Qoosso Komishiine Halantino Mootimma Aliidi Mannihimmate Qoosso Komishiine Borro mini ledo Tigrayete kalaqantino gaance ledo amadisiisante ka`anni noo dagate qoosso kisantino kisse aana assinoonni xiinxallote gumi ripoorte kalqete dagoomi aana adhamooshshe afidhinota xawinsoonni.
Itophiyu Mannihimmate Qoosso Komishiine Komishiinere Dr. Danieel Baqqalihu Itophiyu Pireesete Uurrinshi ledo assino hasaawinni xawisino garinni; Itophiyu Mannihimmate Qoosso Komishiine Halantino Mootimma Aliidi Mannihimmate Qoosso Komishiine ledo halame Tigirayete olinni kalaqantino mannu qoosso kiso aana xiinxallo asse ripoorte muli barra shiqishino. Ripoorte 16 gobbuwa, Halantino Mootimma Ga`labbote Amaale mini sooreeyyenna Ga`labbote Amaale Mini miilla ikkitino gobbuwanni adhamooshshe afidhino.
‹‹Ripoorte harunsitino gobbuwa xiinxallote beeqqaano ikkitinore lamenti uurrinsha ammanantinonna halaalaancho ripoorte shiqishshino daafira galanteemmonsa; ripoortete amaale hedo olu aana beeqqaano ikkitinori lameti bissa loosu aana hosiissanno gede woshshatto assino” yee huwachishino.
Tigirayete Qoqqowira dagate qoosso kisantino yinoonnita Itophiyu Mannihimmate Qoosso Komishiine Halantino Mootimma Aliidi Qoosso komishiine ledo halante xiinxallo assitanno yini yannara, haammata gobbanna Kalqete dagoomi uurrinsha gattukkinni komishiinete aana addi addi xa`mo shiqishshe ninke komishiine aana ammanooshshu dinoke yitino. Kayinnilla, ripoorte shiqqu yannara 16 gobbuwanna Kalqete dagoomi uurrinsha adhitinota xawisino.
Halantino Mootimma Ga`labbote Amaale mini aliidi sooreeyyenna ga`labbote amaale mine miilla ikkitinori lamenti uurrinsha halante assitino xiinxallo adhite olu aana beeqqaano ikkitinori ripoortete aana worroonni amaalete hedo loosu aana hosiissanno gede woshshatto assitinota coyi`rino.
Gobbuwanna uurrinsha lamenti komishiine assitino xiinxallo mittowa higge dassitinokkitanna ammanantinota ikkitinotanna ogimmansanna ikkadimmansa farci`noonnita Dr. Daanieel xawisino.
Tigirayete harinsoonniti mannihimmate qoosso kisote xiinxallote ripoorte aana Itophiyu Mannihimmate Qoosso Komishiineno ammanantinotanna halaalaancho ripoorte shiqishinota hattono shokkitinokkita ikkitinota buunxoonnita kulino.
Itophiyu Mannihimmate Qoosso Komishiinenna Halantino Mootimma Mannihimmate Aliidi Qoosso Komishiine borro mini ledo mitteenni halante tenne xiinxallo assitinohu qaru illachi, Tigirayete oli yannara mayi kalaqaminoro buuxatenna xiinxallate ikkinota Dr Daanieel xawise; kalqete miidiyira mootimma dagate hude olu hayyo gede assite horoonsidhino; sircho hunate looso loossino yinanni kissenna wolootta buunxoonnikki kisse xawo assinota xawisino.
Mite mite daga Maykaadiraho assinoonni barshi sircho hunate loosooti yite yekkeerantanno; Wole widoonni, Tigirayete assinoonni jaddo sircho hunate loosooti yite yekkeerantannori noota kulinohu Dr Daanieel; lamente uurrinsha assitino xiinxallo kalqete dagoomi mannihimmate qoosso seeri garinni loonsoonnita ikkitinohura konni seeri garinni keenniro Maykaadirahono ikko Tigirayete iillinshoonni mannihimmate qooso kisantinota ikkinninna sircho hunate assinoonnikkita xiinxallote ripoorte buuxissino yino.
Olu hanafimi yannanni kayse addi addi mannihimmate qoosso uurrinsha, Kalqete dagoomi miidiyu uurrinshanna hallanyootu, mootimma hude olu hayyo gede horoonsidhanni no yite odeessitinota qaagisinohu Dr Daanieel; dagate mannihimmate kaa`lo iillishate qarru kalqamirono mootimma hude olu hayyo gede assite horonsidhinokkita xiinxallote yannara buunxoonni. Shiqqino kisse kapho ikkitinota afate dandiinoonni. Gawajjantino dagara illinshanni kaa`lo iillitannokki gede lamenti olu bissa mereero qarru noota huwachishino.
Komishiinerichu xawishshi garinni; hattono olu giddo beeqqaano ikkitinore lamenta bissa kaa`litannrinna irkisanno akitivistooti, miillansa, hattono irkisaano olu daafira addi addi kaphu duduwo fincitanni keeshshitino. Konni korkaatinni halaale afate qarru noota kulino. Halaalaancho xiinxallo assate hasiisinohu qaru coyi halaalaancho kaphuwinni badateeti. Ikkinohura, xiinxallote ripoorte halaalaanchonna co`itte ikkitinota kalqe farcidhinota Komishiinerichu buuxisino.
Bakkalcho Bocaasa 2 / 2014
