Qiddist Gezaheny
Hawaasa:- Wo’manti Sidaamu daga gobbate woshshatto adhite dandiitu baalinni hunaano wolqa sharramatenni gobba gatisate assinanni gaadi beeqqaano ikka hasissannonsata huwachishinno; Sidaamu qoqqowi pirezidaantichi kalaa Desti Ledamohu.
Pirezidaantichu tenne yinohu qoqqowoho cancishaano HWHT nna Oneg Sheneha gobba diigate assoote effi’ne giwatenna gargarooshshu olantpra irko ikka xawisate harinsoonni gaado lainohunni odeessaanote uyno xawishshinniiti.
Xawishshisinni jiro amaxxano ikko ille lossira dandiinannihu gobba heedhuro calla ikkinota kule; keeru baiha ikkiro kuni baaluri hendannikkireeti. Konnira techo hoongoommore ga’a gobba heedhuro loonse afi’nemmohura techo noonkerinni kayinse gargarto irkisate hananfoommo irko sufa hasiissannose yino.
Woraddatenni olu base gaadate daga borreessantanni noota kaysinohu pirezidaantichui; Alatta Wondi quchuminni calla 500 ikkanno manni hattono xaphooma 70 ale ikkitanno massagaano borreessantinota lawishshu gede kayse; Sidaamu daga Wole Itophiyu dagante gede gobba gatisate umise qeecha fultanni noo garinni kaajjite sufa hasiissannota huwachishinno.
Gargarooshshu sharro hananfoommo ikkinnina digundoommo yinohu pirezidaantichu; konnira wedellu sharrantannori ledo dargu geeshsha marte sharramatenni annuwu kayinni qooxeessinsa keere baqqinatunni agadhatenninna hattono olu uduunne afi’rinohu borreeessiise aatenni hale ikkanno gede xa’mino.
Konni gobbaanni kiirotenni batidhinokkiri dagate giddo karsante kaphu duduwo ficitanni noo daafira, dagano togoo huluullo kalaqqanno bissa xaadduro ga’labbote bissara mashalaqqe aatenni hale ikkanna kuri woxeho galtinori sayissanno sokkanni dogamatenni qorowama hasiissannota duu’re xawisino.
Juntu wirro hige dayro iillishanno gawajjo anfe badhera hingummokkinni kaajjine sunfe junta hegerera waamme gobbanke keere agarsiinso yaanni Pirezidaantichu amadisiiseno sokkasi saysino.
Bakkalcho Bocaasa 2 / 2014
