Annunna beettu dubbu giddo hadhanni heedheenna beettu annasi xa`mo xa`manno:-
“Anna`ya tenne haqqicho xiiwummoro sinnase milli assa didandeemmo?” yiisi. “Hiitto didandaatto! wo`ma wolqakki horonsidhe wo`naalittoro dandaattokki coy tenne kalqe aana horontanni dino!” yee dawarisi.
Beettuno wo`naalshasi hanafi. Ikkollanna haqqicho lowo geeshsha jawa ikkitinohura sinnase milli assara didandiino. Konni daafira beettu “Anna`ya sorootto! Ani togo assa didandeemmo!” yiisi.
“Wirro higge wo`naali! Yiisi annu. Beettu dandaamisi bikkinni xiiwirono sinna kayinni milli diytino. Beettuno batinye hige wo`naali kayinni hedino gede dikkino. “Hexxo muratenni anna`ya didandeemmo!” yii.
Annuno “Beetto`ya wolqakki baala horonsidhe wo`naali yoommohenka. Ati kayinni yoommohere diassootto” yee beettu agadhinokki dawaro qolisi.
Sokka:- qooxeessinkera noo doorshubba, kaayyo, kaa`lo, hexxo, kaajjille… woleno kuri labbannore horonsi`nummokkinni mittu coy deseynoe Yine hexxo mudha dihasiissannonke. Ayno umisinni wo`ma dikkino; kaa`lonna irko hasi`ranno.
Hexxo murannokki wolu manni giddo, wolootu kaajjilli giddo, wolootu jawaante giddo wolqanke afi`nammora dandiineemmo.
Kaa`lo xa`mi`noommonsa mannooti kaa`la hooggunkero sorino manna xa`mi`noommota afa woy xa`mi`neemmo hayyo soorra hasiissannonketa woy wole yannara xa`ma noonketa huwaata noonke ikkinnina kaa`lo xa`mi’ranke bunshe dikkitino.
Qooxeessinkera noo kaayyo baala horonsi`ra hendoommo coy wo`manno gede assanno. Kaa`lama amma`note gede, budu gedenna qajeellete gede assine hendo!
Bakkalcho Birra 25, 2014 M.D
