Yaareed Geetaachew
Sa’uti 12 aganna Itophiyu daga giddo kolishsho bassa tugge sa’inoti ayerano di gaa’litinote. Kuri aganna giddo qansootu qaensa hooggino. Ama iltino oosose la’anna shinoonni. Mitto mittonka mine dadillu sokka macciishshiinshoonni; amate wodani hiiqqamino. Gobba wi’litino. Cancishaanchu HWHT gaamo dirrate agaranninsa keeshshino gargarooshshu olanto duge qasatenni Itophiyu aana ola lallawihunni kayise tenne kakkacha gaamonni bacare hoongoommo.
Aliye olu hajajo kaampe aana hedeweelcho duganni keeshshe loosse itissino miillasi,Tigirayete qoqqowo 20 diri ale diinunni agartanni keeshshitinore; amana qae’ya yitukkinni Tigirayete dagara waaga baattanni keeshshitino olanto tunsicho gaa’lite barra qoqqowoho uwino kanchafare gargartanni hosse hashsha kalaqamu goxicho goxxinoha dhagge habbannokkinna kalqete assine egenninoonnikki gadinni mitte kaampe giddo gudi.
Hakko hashsha maganu kaa’leenna gattinore soodo agare Sino-Tiraaketenni daahiti Itophiyu dhaggenni addintanni shigiggissannonna kolishsho bassa tuge saino barraati. Sa’uti 12 aganna mittu mittunku wodani giddo bassa tugge sa’inota ikkansa gobbaanni HWHT yaa maatiro huwanteemmo gede assitinote. Kuri manna labbanno bulgo mitto mittonka waaga baatisiissino.
Soorrote Mangiste sa’u 27 dirra giddo cancishaanchu HWHT gashshootinni iillitino barshenna miicco taashshanninna daga mittu wodaninni mittimmate mixora mittimmatenni loossanno gede dandiisate ikkito biddi assate heeshshi gotti yitanna “ Ani reyummoro Hayisso Ciirtoonke” yaatenni cancishaanchu HWHT sharrete loososi mite yee baxxatenni tantaname hanafi.
Birra 24/2013 M.D Aliyye Olantote kaampe giddo gargarooshshu olanto daakku gedensaanni IFDR olu hajajaanchinna Xaphoomu Ministirchi Abiy ahimed (Dr) xawishsha fushshi. Seera agarsiisate qaafo hanaffu. Jajjabba olu massagaano aana file fushshatenna qaafo adhate loosono loosi. Juntu 27 diri giddo jajjabbaa olu uduunnennenna Tigirayete qoqqowira maaxanni keeshshinota huwatinohu Abiyi Qoqqowunni jajjabba olu uduunne fushshinanni gede assinotino sa’u 12 aganna giddo ikke sainoreeti.
Hakkuyinni harunsine cancishaano gaamo massagaano ugaaxatenni mitoota lubbotenni heedheenna amande Seeru albaanni shiqinsheenna yoo agadhitinonsaha ikkanna mitootu kayinni higgannokkiwa hadhanno gede qaafo adhinoonni12 agani bero gumulami.
Itophiyu Olanto 3 lamala geeshsha Meqele amadde keeshshitu gedensaanni Tigirayete daga beedho afidhe gatensa loosidhanno gede Ella 21/2013 M.D ola uurrisate addinni sumuu yee olanto quchumunni fushshirono; egemmaminonsakkinna mundee xuuxa rossinori cancishaano HWHT massagaano sircho hunate assoote suffino dirinna Itophiyu giddo kolishsho bassa tugino assooti sufilla.
Itophiyu mangiste 100 biliyone birra 8 agani giddo calla Tigirayete quchuma wirro gatamarate fulo assitino dirinna Konni albaanni Tigirayete mittu dirira uyinanni bejetenni 10 ero rooranno woxi Cancishaanchu HWHT hunino latishshanna dagate sagalera 8 agani giddo qocci yinota IFDR xaphoomu ministirchi buuxise sainoreeti. Kageeshshi woxi fulo ikkinniina, tuucishshino anga ga’mitanno HWHT massagaano qajeeltinori mite mite quchumu teesaano gargartote olanto wirro qassanni gawajjitinotano dr Abiyi xawisikkinni di saino.
12 agani giddo saada shitino, gatu jajja giirtino; meyaata qaaqqonna geerra si”attino. Manchi beetto lubbotenni hee’reenna giirtino. Kuni duuchu assooti allaggaho yinanni Xaaleenunni nafa di kalaqamino assooteeti.
Birra 24/2013 M.dirinni kayisse birra 24/2014 M.D geeshsha Itophiyu daga aana iillishshino barshe shiimunni la’niro:- Maykaadiraho 1,600 keeraano qansoota mittimmate waamma giddo waantino. Qoobbote 600 manna mittu barrinni qocci assitino. Cina 300 qansooti ale,Affaarete Gaali koomaho 240 manna qocci assitu. Aanteteno Agamsa,Wu rgeessa,Wuccaale,Hayiq… kiirotenni bande anfoonnikki mannasircho mucuqqi assitino Cancishaanchu HWHT gaamo Birra 19/2014 M.D Kombolchaho 100 beebbaataamma wedella dirte uurrisse qocci assitinohu konni 12 agani giddo hambannikki sai diri kolishsho bassa ikke borreessamiono.
Farcote ministeerenna Federaalete Polise jaddote buuxo biiro mitteenni 40 barri giddo assitino xiinxallonni,Aliyye Gondarera 96,Wodiidi Gondarera 130, Affaarete 257 keerano qansoota mucuqqi assitinotano buuxissino.
Tuucishshino anga ga’mitino gaamo assooti qansootunna gobbate aana mamooteno assine egenninoonnikki shigiggisanno assoote assatenni hurannokki kolishsho bassa tuge sairono;baalanti Itophiyu daga mittimma jawu garinni wirro muqaanqeemmo gedenna cancishaanchu HWHT aana noonke gimbe mitte ikkitanno gede assino. Konniraati xa duuchunku Itophiyu daga qaccetenni qaccete geeshsha gaadi yineenna konne gobbate baalaamo bushshu woroonni qolate halantanni noohu. Birra 24/2013 M.D kayise 2014 M.D geeshsha Itophiyaho kalaqamino halaali konneeti Itophiyu dagano konne barra di hambeemmo yite qaagganni heedhanno.!
Bakkalcho Birra 25, 2014 M.D
