Abrahaam Saamueel
Wonsho:- Wedellu gobbate gaadira albaanni dirame gobbasi diinu anganni agare gatisa noosita Wonshi Woradihu qaru gashshaanchi xawisino.
Wonshi Woradi Qaru Gashshaanchi Kalaa Gennene Gizawu Itophiyu Piresete Uurrinshara coy`rinonte gede, tenne yannara gobbankera jawa qarranna danqara ikke nooha Cancishaancho HWAT wirro baqqi yitannokki gede assate wedellu albinni roore gobbasira albaanni dirame diinu anganni gatisate qeechi noosita xawisino.
Annuwa jawa kakkalonni keeshshishshinota tenne gobba agaratenna diinu xagarronni gatisate tini ilama yawo adhitinota kulinohu Qaru Gashshaanchi, gobba gatisate wedellu ledo daga mittimmatenni uurra nooseta huwachishino.
Baxxinohunni, wedellu halante qooxeessansanna gobbansa agadhatenni noonsa qansichimmate qeechansa fultanno gede qaagissino.
Itophiya diigate gobbaydi wolquwa ledo gano gantanni nooti wolquwa wirro ka`annokki gede assatenna Itophiyu wolambinate buuxisiisa qara guulcho ikkitinota kulino. Baxxinohunni mootimma adhitanni noo qaafo irkisatenna harancho yanna giddo kuni gaadi jeefo gananno gede assa hasiissanno yiino.
Wonshi woradi dagooma gamba asse olu gaadira addi addi irko assanni noota xawisinohu Qaru Gashshaanchi Gennene, albillichono kaajjadu garinni irko assinanni sunfannita qummi assino.
Bakkalcho Birra 18 / 2014
