Abebech Maatewoos
Addis Ababa: HWHT cancishaano gaamotinna Shene qodhaano gaamoti qullaabbinokki waaxama diigama noose yaatenni Ameeriku Amaale mini miila Kaarn Baas qorophissu.
Ameeriku Amaale mini miila Kaaren Baasi cancishaanchu HWHT qaaqquulle olaho filate assootesi uurrisanno gedeno qorophisiissino. Cancishaano wolqansa Amaaru qoqqowinni fushshitaranna oneg shenete qodhaano gaamo ledo noosi waaxamano uurrissara huwachishshino. Lamenti gaamo Itophiyu paarlaamira cancishaanote yine gumulloonnita qaangannite.
Amaalete mini hedosi uynohu sa`u hamusera Ameeriku amaale mine gobbayidi hajubba komite woyyeessinoonnita (H R I S 445) loonsoonni gara wonshi gedensaanniti. Ripoortete aana xawinsoonni garinnino cancishaano HWHT olaho filtinonsa babbaxxitino qaaqquulli gobbate tuqu xaadooshshuwara uminsa hedo uytino.
Cancishaano HWHTni filantinonna olu bayichira bobbakkino mereerinni 13 diri qaaqqi afamanno. Qaaqqu yaanno gara ikkiro cancishaano HWHTni amadaminohu Allamaaxa quchumira doogote aanati. Hakkiinni isinna wole jaallasino xuruuramaanchu kaameelinni hogowante affinokki qooxeessa martino. Hakkono lame lamala geeshsha keeshshitu.
Hakko bayicho olaho hadhannotanna diinu ledo olu uduunninni qasantannota kullinsa. Ikkinohurano barra wo`ma olu giddo qasantanni hossinota huwachishino. Tenne yannara wiliilannoricho uynoonninsatanna wiliishshidhanno woyteno assitannori ba“annonsatanna hagiirru macciishshamme leeltannonsata xawise; umonsa kayinni gargadha dandiitinokkita qaagino.
Olu xiiwanni daaytanna Itophiyu gargarooshshu olanto cancishaanote wolqa ganita cancishaanote gaamo hajajaanchu olaho badheenni ikke umosi gatisate ba`anno furcho afi`rate wo`naalinonka. Mitte izze giddo afantanno 25 HWHT cancishaanote gaamora olantanno qaaqquullinni 24 ooso olu basera reytino. Reyotenni gatino qaaqqi “Anino umo`ya gatisate way lolahanno boombe giddo maaxame umo`ya gatisa dandoommo” yiino.
Wole cancishaanchunni labbino xagarro xaaddinoseti Iyyerussaalem Haylay iseno xawissanni; seerimale cancishaanote gaamonni wolqateni amande Meqele quchuminni olu bayichira massinoonnisehu maaja 7nni ikkinota coyidhino. Eyyerusaalemi xawishshi garinni;
cancishaanote gaamo olu bayichira massitinonkehu qajeelsha uytunkekkiinniti; gaamono harancho yanna giddo ola qeelle Addis Ababa e`neemmo yaatenni sorisate qaale e“atenniitinka yitanno.
“Olu hanafita ninkeno yaandummo; ikkirono anganke Itophiyu gargarooshshu olantora uynummo” yitino.
Woleno cancishaano HWHTra olantanno qaaqqo Heelen Hadego ise widoonni; Meqeletenni Affaarete qoqqowira massininsa woyte affinori mitturichino dino; olu yannarano qaaqquulle olantora buskuutenna xashshu waay gobbaanni shiqannonsari horontanni dino.
Itophiyu gargarooshshu olantora angase uytu woyte jaallase lowo geeshsha yaaddinota xawissannoti Heeleni ise kayinni hatte yannara hagiirraame ikkitinota qaagganno. Jaallaseno Tigrayete daga qaaqquulle olaho filate assoote efedhe giwatenni sharrantanno gede woshshatto sayissanni noonka yitino.
Isayyaas Alemihuno cancishaano HWHT gaamonni olaho filamino qaaqqo ikkanna; isi yaanno gara ikkiro; cancishaano HWHT gaamo Tigrayete qaaqquulle wolqatenni horonsi`ratenni olaho filanni afamanno.
“Aninna jaalla`ya rosate hedo noonke; dancha qansicha ikkateno” yaannohu Esayyaasi ikkollanna cancishaano gaamo olaho iillinoommokki ooso olu xawira sowatenni qubbichunni kiirranni manni horora yine ga`ata ajuujanke gufinsoonni
yee coyi`rino.
Itophiyu gargarooshshu olanto adhitino hayyitte qaafonni heeshshonsa gatisa dandiitinota xawisinohu Esayyaasi; Tigrayete qaaqquulli heeshsho shotisatenni heeshshonsa yanna seedissannori cancishaanote biilto insa ooso kayinni gobbayidi gobbuwara sowatenni rosiisidhanno. Ikkinohurano cancishaano HWHT assooti mararsannonna, saalfachishannoho yee xawisino Esayyaasi.
Bakkalcho Birra 18 / 2014
