Abebech Maatewoos
Hawaasa: Qoqqowoho 21%te xibbuunni ikkitanno daga quchumu giddo heedhannota xawinsi. Gobbate deerrinni quchumu bikka xibbuunni 22%te ikkasinna muli yannarano Hawaasi yuniverisite assitino xiinxallora Sidaamu qoqqowiti 21%te xibbuunni ikkinota qoqqowu quchumunna konisitiraakishiinete biiro sooreessi kalaa Fisseha Fichoolihu coyi`rino.
Qoqqowu giddo sase kiilo meetire badooshshinni quchumma no yiinohu biirote sooreessi; baadiyyetenni taalo quchumu aana addi illacha aatenni loosa xa`mannohura quchumu widira lophitanni afantanno baadiyyete latishshu mereershuwara iskeech pilaane qixxeessatenninna doogo fanatenni baatto loosidhe galtinori quchumu heeshsho rossanno gede assate jawa iillacha tunge loonsanni looso ikkinota xawisino.
Baxxinohunni Kalaa Fisseha Fichooluhu Itophiyu pireesete uurrinshara bakkalcho gaazeexira uyno xawishshira; qoqqowu giddo 3 km badooshshinni quchumma tantanantannoha ikkiro mittu mitto itanni ha`ranno amanyooti kalaqamanno; Mittimmatenni lophate akati dihee`ranno. Konni daafira togoo akati kalaqamannokki gede latishshu mereershuwa bade latisa hasiissanno yiino. Konnirano gobbate gede Federaalete safote latishshinna quchumu latishshi minisiteere ledo qinaawatenni olluubbate latishshu pilaane qixxeessate wo`naalsha assinanni hee`noonnita egensiisino.
Xaa yannara 3Km badooshshinni baatto loosidhe galtinori quchuma kalaqqanni no yiinohu kalaa Fisseha; togoo assootubba laanshaabbino quchumma kalaqantanno doogo fanannohura olluubbate pilaanera addi illacha aatenni mittu quchumi wole miicannokkinna quchummate lopho olluubbate pilaanenni massagantanno gede assate loonsanni hee`nonnita xawisino.
Kalaa Fisseha xawishshi garinni; qoqqowu giddo seeda yanna albaanni xintantino quchumma hasi`nanni latishsha abbitukkinni keeshshitinori no. Quchumma qajeellenna owaantete mereershuwa ikkansa aleennino
jawa woxe millinsanni mereershuwaati. Ikkollanna kuri mereershuwa konni bikkinni lattara dandiitanno poolisenna istiraateeje qixxeessine hasi`nanni soorro dagganno gede massanganni keeshshinoonni garino umisi foonqe nooho yiino.
Ledoteno Sa`u 27 dirrarano baadiyyete uyinoonni illacha quchummate uynoonnikkita coyi`rinohu kalaa Fisseha; quchumma gashshinanninna latinsanni mixo qixxeessatenni millimillo
hananfoonnihu 1998M.D kawa ikkirono Quchumma massagantanno poolise hee’ra hoogase quchumma garunni lattannokki gede assinotanna quchummate massagaano illacha uyte massaga hoogansanni jawa xe`ne no yiino. Konni kaiminni quchumma hasi’noonni garinni lopho maareekkitinokkitano buuxisiisino.
Bakkalcho Birra 18 / 2014
