Abrahaam Saamueel
Addis Ababa:- Itophiyu mootummanna daga Sudaanete kalaqamino qarra keeru doogonni tidhamanno gede Sudaanete daga ledo uurritanotanna umise kaa`lo assate qixxaabbe noota IFDR Xaphoomu Ministirichi Dr Abiy Ahimedihu xawisino.
Xaphoomu Ministirichi dagoomu tuqi qoolisi aana Arawete afiinni saaysino sokka garinni, Suudaanete daga tenne yannara gobbate kalaqamino qarra uminsa wolqanni woy dhukinni tirate dandoo noonsa yine ammaneemmo. Suudaanete kalaqamino qarri keeru doogonni tidhamanno gede Itophiyu mootummanna daga Suudaanete dagara qoteho uurritannotanna umisi qeecha fulate qixxaawe noota xawisino.
Itophiyu mootimmanna daga Sudaanete kalaqaminoha yannate qarra mule hee`re harunsanni noota xawisinohu Xaphoomu ministirichi Dr Abiy Ahimedihu, konni albaanni gobbate kalaqame saino sumuu yaa hoogate qarra hasaawunni tidhamanno gede assate Itophiyu Afiriku Mittimma ledo ikke jawiidi qeecha fulinota qaagiissino.
Jawa Sudaanete daga kaajjado sharronni xa noo lophote doogo qineessatenna albilicho sufisate kalaqamino qarra gobbate seeri garinninna Jubu sumimme kaima assine keeru doogonni tira hasiissannota kaajjishe huwachishino. Konnirano, Sudaanete daga kalaqamino qarra uminsa dhukinni tirate dandoo noonsa yine ammaneemmo yiino.
Lamenete gobbuwa daga mereero noo xaadooshshi seeda yanna dhagge noo daga ikkitinota xawisinohu Xaphoomu Minisitirichi Dr Abiy, lawishshaho, baayridihu Abbay Lagira insano annuwa ikkitinkota kulino.
Itophiyu mootummanna daga kalaqamino qarri keeraanchimmatenni tidhamanno gede Suudaanete daga ledo uurritannotanna umise qeecha fulate qixxaabbe noota buuxisino.
Qoleno Soojjaati Afiriki qooxeessira gobbuwate mereero e`e gobbate hajora bulbultanni qarra kalaqatenna insa roorrimma leellishate assitanni noo gobbaydi wolquwa seekkine harunsa hasiissanotano qaagiisino.
Sudaane jajjabba massagaano gobbate olanto angara e’unkunni techo ontikki barra ikkanna; gobba olantotenni massagantanno gede reekkote mootimma uurrinsoonniti qaangannite.
Bakkalcho Birra 18 / 2014
