Amsaalu Felleqe
Addis Ababa;- Cancishaanchu HWHT kaphu duduwi gargarooshshu olantonke qeellete harinsho gufisannokkita IFDR Gargarooshshu Ministere egensiissu.
Gargarooshshu ministere tenne hajo lainohunni fushshitino xawishshinni; cancishaanchu HWHT gaamo egennantino hayyonni mitte kaphu duduwo ikkinota qaagiissino. Cancishaanchu gaamo umisenni fantino olira gargarooshshu olanto adhitanni noo qaafonni wolqa hoogguta ikkitinokkire ikkinoommo; assitinokkire assiinoommo yitanni kaphunni dudubbanni daga so’risiisa; gaamo kalaqamisenni rosantino akataseeti yino.
Mitte yannarano halaale coyidhannokkiti hunote gaamo; qeelantanni dagginota anfannisekki gede olantonke su’ma hunate looso loossanni no yitinoti Gargarooshshu ministere; dukkisaanonsa cancishaano gaamo aana iillanni noo kisaara affannokki gede; keeraano daga oosonsanna sagale xa’midhannokki gede hatono kalqoomu dagoomi loossanno hilo huwatannokki gede assate duucha yannara rosaminoha gargartonke su’ma hunate loosonsa kaajjishshe suffino yitino.
Worbuullu gargarooshshu olantonke su’ma hunate Juntunniha kaphu duduwo fincitannori duucha yannara loosonsa assidhe dudubbanni noota la’noommo; macciishshinoommo; keeraano daga shitu, giirtu, yitanni kalqete dagoomira iillishsanna la’noommo yitino ministere.
Kuri duucha yannara gargarooshshu olantonke su’mma hunate assinanni gaadi soodo loji gede ba’’annohanna halaalu kayinni yannasi agare fulannoha ikkasi
xawissinoti ministere; hunote gaamo duduwunni dukkisaanonsa hecheemmo kadisiissurono gedensaanni kayinni dagankenna kalqoomu dagoomi noo halaale huwattanni dagginota kultino.
Gargarooshshu olantonke dagannita ikkase cancishaanchu gaamo kaadurono mannimma macciishshantannonsare ikkansanna gobbate ayirrinye agaratenna agarsiisate uurritinore; dagate ooso ikkansannino dagate qarrano hagiirreno mitteenni beeqqitannorenna shitara daggino diinna qafadduro nafa qoossonsa kisantannokki garinni awuuttannore ikkansa kalqe affino halaaleeti yitino.
Olantonkehu akatu konne ikke hee’reenna cancishaanchu HWHT gaamo dukkisaano muli barruwa kawa rosaminoha kaphu duduwonsa kalaqaqanni dagoomitte mashalaqqe qoolira gargartonke uddano lawisse uddidhe wolootaho lawisate loossanni noo diraama ikkasi daganke huwattanno gede xawinsanni olantonke gobba diigate kainoha cancishaanchu gaamo adhitanno qaafo kaajjishshe suffannotanna qeelletennino gumultannota ministere xawishshisenni egensiissino.
Bakkalcho Birra 18 / 2014
