Abrahaam Saamueel
Addis Ababa:- Itophiyunnititi bubbete wolqa adhitanni noo qaafonna gano hasi`noonni darga iillishshe diinu olanto heedhanno baycho badde buluulo assitanni ha`ra Bubbete wolqara mageeshshi geeshsha ikkado dandoo nooseta leellishannota albi olanto miili Birgadeeri Jeneraal Mesfiini Haylehu xawisino.
Birgadeeri Jeneraal Mesfiini baxxinohunni Itophiyu Pireesete Uurrinshira xawisinonte
gede, Itophiyunniti Bubbete Wolqa tenne lamalara Horophilunni qaafo adhitanni nooti dargase gantinotanna diinuyta olantote base badde horo aannokki gede assite buluulo qoltinota umisenni ikkadu dhuki nooseta leellishannoho yiino.
Olu harinsho uulla no wolqanninna dagate ledo halamatenni ikkinota kulinohu Birgadeeri Jeneraala Mesfiini; harinsho Bubbete Wolqa umiseti ikkadu qajeelshu dhuki noosetenna kalqe farcidhannote; Bubbete Wolqa dhuku noosetano leellishshanno yiino.
Bubbete Wolqa wiinamu dawaro aatenni dandoo noosete; baychunna ikkitto di-ittisannose. Ikkinohura, tenne wolqa babbaxxino olu baycho horoonsi`ra hasiissanno yiino, Birgadeeri Jeneraal Mesfiini.
Cancishaanote gaamo aana adhinanni qaafo rahotenni gumula hasiissanno. Diinu awaawuranni daga cancishanno baychi aana seekkine illaalisatenni afantanno tajenna mashalaqqe kaima assine qaafo adha hasiissanno. Uulla noo wolqa irkisate
diinuwiinni olu xaadanno woyte diinu wolqa ganate millimillo heedhara hasiissanno yee amaalino.
Gobbate danni gobbaanni ikkiro mootimmannita aliidi bissa xa`mine fajji’nanniha ikkino daafira qarrisannorichi no. Diinunnita badhiidi wolqa woy hodhishshunna addi addi wolqa badheenni ganate gobbate giddo harinsanniha ikkiro, hasi`nanni olu uurrinsha qixxaawo, qajeelshanna mittimmate looso calla hasiisannota qummi assino.
Gobbate giddo mimmitu ledo woy dannu giddo assinanni oli diinunnita badhiidi wolqa, hodhishshanna addi addiha olu uduunne kuunsanni deeppo, manna qajeelsinanniwa, olanto qajeelsinanni baycho horo aannokki gede assa olunnita harinsho soorritannota coy`rino.
Konni olu uduunnichi aana qaafo adhanna buluullo assa luphiimu deerrinni balaxo assa hasidhanno hayyooti. Tini uullate aani ola irkisatenna olu harinsho meessi olanto qeeltanno gede assate jawa dandoo uytannota kulino.
Cancishaanchu HWHT wolqa, mannu wolqa qajeelshitanni fushshitanno baycho ikinohura qajeelshu uurrinsha aana qaafo adha hasiissannote. Bubbete Wolqa adhitino qaafonni dargasi ganinohonna danchu gumi leellinoha ikkinota qummi assino.
Hasi`noonni darga ganate woy qaafo adhate assinoonni illachi halalaancho ikkinota xawisinohu Birgadeeri Jeneraal Mesfiini, daga noo quchumi aana assinanni Bubbete Wolqanni adhinanni qaafo tekinolojetenni ikkadu garinni qajeelshine halalaancho baycho illetenni seekkine buunxe ganate hattono olu urdenni xiinxalline qaafo adha dhuka xa`mitanno. Itophiyunniti Bubbete Wolqanna olanto jawu dhukisenni konne leellishate dandiitino yiino.
Tunganni olu urde qooxeessaho wole gawajjo daggannokki gede qoropho assinanniho. Tenne xiinxallonni Bubbete Wolqa qaafo adhinanni darga xiinxallasinni halalaancho darga ganino yiino.
Olu giddora e`ino wolqa umise wolqa kaajjishatenna qixxaawate ayee woyteno badheenni addi wolqanna olaho hasiissanno
uduunni hee`rannose. Kuni badhete miqichi ganamanno woyte olu albaanni noo olanto hasiissannose kaa`lo afidhannokki daafira yannate harinshonni ubbanninna qeelamate kayyono hala`litanni daganno.
Bubbete Wolqati jawiidi horo uullate noo olanto iillitannokki baycho balaxxe marte qaafo adhite diinu wolqanna dhukasi ajishate. Tenne yannara Bubbete Wolqa olu baycho calla xinxallite hakkonni baychi aana qaafo adha halalaancho loosooti yiino.
Albi yannara togoo olinni Somaaliyahonna Aliyyerano assinanni hee`noonni oli gede, daga noo base, amma`note uurrinshanna addi addi baychi aana qaafo adhinanni.
Itophiyunniti Bubbete Wolqa tenne lamalara bubbetenni rophilunni assitanni noo oli illacha assinohu, Cancishaanchu gaamo olu uduunne kuussanno baycho, gatamarranniwa, qajeelshu uurrinsha, hajajo uynanniwanna olaho hasiissanno uduunne shiqinshanni baychonna miinja horrite maaxate horoonsidhanno kaameella hattono jajjabba olu uduunne seekkite badde buluulo assitinoti qaangannite.
Bakkalcho Birra 18 / 2014
