Addisu Adoola
Addis Ababa: Yirgalamete Waaxamino Giwirinni Industirete Paarke hanafotenni kayisse qarqaru dagooma beeqqisiissanni loossanni keeshshitinota Sidaamu Qoqqowi Industirete Paarkubba Latishshi Korpooreeshiine Qaru Loosu gumulsiisaanchi Kalaa Birru Woldehu egensiisi.
Qaru loosu gumulsiisaanchi Bakkalcho gazeexira xawisino garinni, hiittee pirojekiteno loonsanni yannara dhaaaddotennino ikko xaaddo ikkitinokki doogonni qarqaru dagooma horaameeyye assitannota xawise; Yiragalamete Waaxamino Giwirinni Industirete Paarkeno qarqaru dagooma addi addi doogonni horaameeyye assitanni afantanno yiino.
Yiragalamete Waaxamino Giwirinni Industirete Paarke gobbate deerrinni amandoonni shoole jajjabba waaxamino giwirinni pirojekittubba mereerinnino mitte ikkitinota qummeessinohu qaru loosu gumuiisaanchi, tini paarkeno muli yanna nni IFDR Xaphoomu Ministeerchi Dr Abiy Ahimedihunni maassante looso hanaffinota qaagiisse; pirojekite ijaarshu yannanni hanaffe qarqaru dagooma beeqqisiissanni loossanni afantanno; xaa geeshshano shoolu kumi ali mannira loosu kaayyo kalaqantino yino.
Qarqaru mannira loosu kaayyo kalaqa paarkeno ikko kaampaannate xeertotenni abbite qaxadhantenni mule afi’ransa elo ikkitinota coy’rinohu qaru loosu gumulsiisaanchi, togo yineemmo woyte wolu qarqarinni daynohu diqaxaramanno yaa ikkikkinni hiikko qarqarinnino daye mannu ogimmasinni heewisame sairo qaxaramara dandaannota huwachishino.
Tini paarke konni qarqarira ijaarsamase qarqaraho baatto loosidhe galtinorino laalchonsa seeda doogo adhite ha’ratenni gatte dikko mule afidhanno gede assatennino sae; laalchuno shoyimmatenni shiqanno aante noo dikkote kaayyo afidhanno gede assannota qummeessino.
Kalaa Birru, woleno mitto qarqara mitte pirojekite dagganno woyte nookkihu safote latishshi daannota kule; tini paarkeno 1.5 km carete doogo, paarkete qarqarira 8 km kolishsho doogo, waanna caabbichu wolqa goshoonshe massinanni hee’noommo yino. Tini industirete paarke dhaaddotenni ikko dhaaddiweelo ikkitinokki doogonni qarqaru dagooma eltanni noota huwachishino.
Jeefoteno, xaa geeshsha paarke loosu kaayyo kalaqatennino sae qarqaru dagoomira ogimma rosiisate kaayyo kalaqqino daafira qarqaru wedelli hadhe heewisamate kaayyo kalaqantannonsa yiino.
Bakkalcho Birra 18 / 2014
