Hawaasa:- Sidaamu Baanke gutu maamari xaphooma kaappitaale xaa yannara 569 miiliyone ale iillitinota xawinsoonni.
Sidaamu baanke aksiyoonete hiro 2 miiliyone ikkanna 1.45 biiliyone birra Wocawaaro 20/2014M.D geeshshano 1845 manni baankete akisiyoone hidhitinota baankete gambisaanchi kalaa Abrahaami Maarshaalohu xawisino.
Konninnino 473 miiliyone, 617 kumenna 300 birra gamba assinoonniha ikkanna Maykirofaynaansete baantoonni kaappitaale 95.4 miiliyone birri ledo xaphooma baankete kaappitaale 569 miiliyone, 97 kumenna 300 birra iillinotano gambisaanchu xawisino.
Kunino baanke safate dandiissanno deerra iillinota xawisinohu gambisaanchu; owaantete baatooshshinni aksiyoone hidhitinoriwiinni 27 miiliyone, 785 kumenna 200 birra gamba assinoonniha ikkanna; babbaxxitino baankete loosira Wocawaaro 15/2014M.D geeshsha 6 miiliyone, 206 kumi, 465 birri fulo ikkinotano qummi assino.
Sidaamu maykiro faynaanse uurrinsha lallawu kiiro 40/1988M.D garinni dagoomaho liqootenna suuqote owaante aate Maaja/1990M.Dra Itophiyu Biheeraawe Baankenni seeru garinni fajjo afidhe safantinota ikkaseno tenne yannara xawinsoonni.
Uurrinsha 1991M.Dra xintantu yannara 7 sinnanna 63 losaasinenni hattono 200 kumi birri baantoonni kaappitaalenni; 16 miiliyone xaphooma jironni ikkanna hako dirinni 2010 liqoote owaatamaanora 4 miiliyone birra liqoo uyitinoha ikkanna 298 kume birra dagoomuwiinni suuqo gamba assitinotano shiqino xawishshinni afate dandiinoonni.
Uurrinsha dagoomaho owaante uytanni keeshshitu yanna giddono 186 kumi ale ikkitannori liqoote horonsi’raanora 2 bixxille 2 biiliyone ale birra liqiissitinoha ikkanna uyinoonni liqoo qolsiisate ragaannino 1 bixxille 82 biiliyone birra qolsiisa dandiinoonniha ikkanna gumulshuno xibbuunni 98 anga iillinotano gambisaanchu lede huwachishino.
Suuqote woxe lainohunnino dagoomuwiinni 200 kumi ale ikkitino owaatamaanowiinni 1 bixxille 1 biiliyone birra gamba assa dandiinoonni yinohu gambisaanchu kalaa Abrahaami Marshaallohu; konni garinni shiima suuqotenna liqoote owaante aatenni looso hanaffinoti Sidaamu maykiro fayinaanse uurrinsha diru dirunkunni agarroonni geeshshi deerra iillano hooghuro kayinni yannate gedensaani jawa illacha tungeenna uyitanno owaante halashshatenni xaa yannara sinu borro minna batinyi 30 iillinoha ikkanna loosaasinete batinyino 398 iillino yino.
Amsaalu Felleqe
Bakkalcho Birra 11, 2014 M.D Hamuse
