Addis Ababa:- Oromiyu qoqqowira Booranu Zoonera xeenu anje korkaatinni kalaqantino moolle kawiinni sa’ino gawajjo iillishshukkinni gargadha dandiinanni gede mootimma 30 Miliyoone Birra gaantinota Oromiyu qoqqowi danote bidhatto komishiime xawissu.
Qoqqowu danote bidhatto komishiine Laynki komishinerchi kalaa Gerremu Oliqahu Itophiyu Pireesete uurrinshara xawisino garinni; Booranu Zoonera kalaqantino moolle akkimale gawajjo iillishshannokki gede mootimma illacha tugge loossanni afantanno.
Laynki komishinerchi xawishshi garinni; Xaa yannara kalaqantino moolle Booranaho wayinna sagalete anje iillishshino. Kalaqamino qarrino mannunna saadate lubbo aana gawajjo iillishannokki gede saadate sagalera 10 Miliyoone hattono danote reqecci yitino dagara kaa’looshsheho hosannoha 20 Miliyoone birra qoqqowu mootimma widoonni gaammoonni. Ledoteno 15 wayi Botte uurrinshunni gaammeenna wayi anje qarra gatisate looso hanaffino.
Layinki komishinerhi xawishshi garinni; Wocawaaro agani bocira qooxeessaho gananno yine agarroonni xeeni Sase Woradda gobbaanni ganikkinni gatasinni Zoonete moolle kalaqantanno gede assinotanna qooxeessahono sagalete, wayinna saadate sagale anje kalaqantanno gede assino yino.
Zoonete Seeftineetetenni hanqafante uurrinshunni kaa’lo afidhannori 500 kume ikkitanno qansooti heeransa kaysinohu Laynki komishinerchi ;Xa kalaqantino moolle korkaatinni 166 kumi daga qarraho aamanturono qoqqowu moolle luphi yino qarra iillishshannokki gede balaxotenni Lamu agani geeshsha keeshshanno kaa’looshshe iillishanni afamannota qummi assino.
Saadate sagale korkaatinni saadate jiro aana luphi yitino gawajjo iillitannokki gede qoqqowu saadate jiro ejense, dureeyyenna dancha fajjo uytannori ledo ikkatenni qarunni alichaamu qooxeessinni saadate sagale hogombe massatenni xaadino qarra gatisate sharro assinanni hee’noonni yinohu kalaa Gerremu; qachu Zoonnanna Woradda konne qarra halante tirate irko assitanni afantannota coyi’rino.
Mannu loosinotinna kalaqamu dano gattannokkire ikkansanni baalanti daga wayi jiro qorophotenni horonsidhanno gede xa’minohu laynki komishinerchi; xaano ikkiro Gammoojjaamu qooxeessira higge higge xeenu anje kalaqantanno qarqarra baxxinohunni Soojjaatinna Galchimi Harerge, soojjaati Baale, Galchimi Arsinna Guje ikkado xeena afi’rate kaayyonsa bikkantinota ikkasenni afi’noonni waa qorophotenni horonsi’ratenni hasiissanno qoropho assa hasiissannonsata xawisino.
Qiddist Gezaheny
Bakkalcho Birra 11, 2014 M.D Hamuse
