Addis Ababa:- Yannanniha Itophiyu akata huwatinokkihu cancishaanchu HWHT Dargete gashshooti yannara horonsi’rinoha su’ma hunate qodhotenni sharramate hayyo adhe daasi ikkito ba’inosita leellishannoho yaanni Beker Shaalehu (Dr) xawisi.
Loosunna ogimmate ministere Di’eeti Beker Shaale (Dr) Itophiyu pireesete Uurrinshara uyno hedonni; gaamo xaa yannara Dargete yannara horonsi’ranni keeshshinoha sharrote hayyo adhe furduggi yino. Cancishaanchu HWHT xaa yannara dhaadotenni fanino oli mullawa ga’namatella.
Cancu gaamo kakkachanna shaannoha ikke hee’re mannimmate qoosso su’minni hude qara sharrote hayyo gede horonsi’re mootimmate su’ma hunate loosanni keeshshinota kaysino.
Xaa yannara Itophiyunniha yannate akata huwatinokkihu cancishaanchu HWHT wirro biilloonye amadate Dargete gashshooti yannara horonsi’rinoha su’ma hunatenna qodhotenni sharramate hayyo doorsha assi’re daasi ikkito ba’inosita leellishannoho yaanni Beker Shaalehu (Dr) xawisino. Ikkirono kuni assootisi xaa yannara nooha Itophiyu daga akata afa hoogatenni ikkinota qummi assino.
Cancu gaamo biilloonyu hasattosi wolqatenni wonshi’rate Tigrayete daga gadachishe qawwe amadisiise olaho diranni afamanno. Sikkollana gaamo qasantanni noohu Dargete yanna gede mitte gaamo ledo ikkikkinni wo’mante Itophiyu daga ledo ikkinohura daga gudisiisate gobbaanni hiikkirano iillishshannosikki sharro assanni noota buuxisino.
Itophiyu daga hasidhannota umise mootimma doorshunni buuxidhinotanna gobbase daafira noose uurrinsha huwatoommero cancishaanchu HWHT techo Darge qeelantino shallago adhe dika’’annonkanni yino.
Cancishaanchu gaamo uyinoonnisi kaayyonni la’neenna wo’mante Itophiyu daganni gimboonnisita afanni hee’re daga sharrante abbidhino mootimma ba’eenna wolqise biilloonye amadate wo’naalasi macharaaraanchimmasi leellishanno yinohu Bekeri (Dr); halaalu kayinni biilloonye amadannire agurranna hunote assootisinni maaro adhe dancha su’ma afi’rate nafa seeda dirra adhannosiho yino.
HWHT dhaaddote olinni ikko su’ma hunate assootisinni shiima yannara keeshshara dandaanno ikkinnina hiikko garinnino ikkeenna Itophiyu daga ledo giwame afi’ranno gumi nookkita xawisino.
Cancishaanchu gaamo xaa yannara hanafinoha hunote assoote agurannokkiha ikkiro ola harancho yanna giddo jeefisatenni Tigrayete kadotenni fushshatenna xaphoomu Itophiyu qansooti aana iillishanni noo barshe uurrisanno gede assinannitano coyi’rino.
Amsaalu Felleqe
Bakkalcho Birra 11, 2014 M.D Hamuse
