Hawaasa:- Loosu kaayyo kalaqqannotanna jawa Indusitire amada dandiitanno hala’lado quchumu baatto adhite seeriweelo seeda dirrara huxxite keeshshitinota Sidaamu qoqqowi investimentete komishiine komishiinerichi kalaa Dessaaleny Mesa egensiisino.
Investimentete komishiine baatto digashshitanno; quchumu baatto gashshannohu quchumu mazegaja, baadiyyete baatto gashshannohu baadiyyete baattote gashshoote ikkasinni tenne coyibba gashshitanni suffanno mootimma investimentete baatto badatenni loosu giddora eessa jawa hajo ikkitinota kalaa Dessaaleny Mesa coyi’rino.
Komishiinerichu kalaa Dessaalenyi xawishshi garinni; baxxinohunni mootimmate baatto amadde lame dironna hakku aleenni keeshitinori aana mootimma lallawu wodho garinni qaafo adha nooseehura kunni aana iiillachunni harunso assinanni yiino.
Kalaa Dessaaleny baxxinohunni Itophiyu pireesete uurrinsha bakkalcho gaazeexira xawisino garinni; mootimmannita hala’lado irshubbanna ijaarshu base adhite loosu giddora e’inore, e’inokkiirenna e’e amandoonni yanna giddo jeefisate laafinore Hawaasi quchuma lede badate sa”i baajeetete dirira wo’naalsha assinoonni. Kuri giddonni Hawaasi quchumira calla 126 ikkitanno piroojekituwa seeda yannara huxxante loosu giddora e’inokkiti quchumu baatto noo yineenna Hawaasi quchumu investimente halashshate borro mini ledo qinaabbe badate looso loosate wo’naalloonnita xawisino. Ledoteno hajo la’annonsari deerru deerrunni afantanno mootimmate bissa maazzagaajju ledo halante qaafo adhitanno gedeno assinoonni yiino. Qaafo adhate hajo la’annonsa bissaa ledo halamme seeru hanqafo qixxeessitannotano xawisino.
Abebech Maatewoos
Bakkalcho Birra 11, 2014 M.D Hamuse
