Addis Ababa:– Cancishaanchu HWHT Itophiya diigate qoqqowu daga hale assi’re ola fanatenni assanni noo sharrote hayyo daga gobbate gargarooshshu olantora qoteho uurrite sharrantanno gede mootimma woshshatto assitu.
Mootimmate komunikeeshine owaante ministircha ikkinohu Leggese Tulluhu (Dr) yannannite gobboomitte hajo lainohunni uyino xawishshinni; cancishaanchu HWHT gobba diigate haaro olu hayyo horonsi’ranni afamanno. Hunote gaamonni fannoonniha duumballicho ikkinoha olu hayyo gargarooshshu olanto ledo ikkatenni duuchunku sharramara hasiisanno yino.
Itophiyu mittimmara uurritinori duuchunku qansooti tino hajo la’annonsa yinohu ministirchu; olu gobba kaaddino diinnanna Itophiyu ayirrinye agarsiinseemmo yitanno wolquwa mereero harinsanniha ikkinohuraati yino.
Cancishaanchu gaamo tenne yannara ola faninohu qaru illchi iillino gide gamba assinanni yanna ikkasinni canco kalaqanni loosidhe galtinori gide mooratenna mulqate injaannosi gede ikkinota xawisino.
Ola fannoonni qooxeessira heedhanno daga halante diina sharramanna jajjinsanna mannu lubbono ba’annokki gede baqqinatunni gadha hasiissanno; wolootu qooxeessuwara heedhanno daganke kayinni gobbate miinja lossi’rate loossara illacha tugge loosi’ra hasiissannonsatano huwachishino.
Daga hiitte yannarano aleenni qooxeessinsa keeraanchimmanna ga’labbo seekkite agara hasiissanno; gobboomitte hajubba lainohunni mootimma hayyotenni massagganni annimmate qeechase fultanno; dagate wolqara aleenni ikkinoha kayinni gobbate gargarooshshu wolqa qaafo adhitanni taashshitannoha ikkanno yino.
Cancishaanchu HWHT Itophiya diigate haaro sharrote hayyo hanafinota qummi assinohu ministirchu; xaa yannara ola fanino qooxeessuwarano gobba diigate ajuujasi wonshi’rate daga hale assi’ratenni Tigrayete qaaqquulle gudisiisanni; keeraano qansooti lubbo danotenni ba’anno gede assanni afamanno yino.
Cancishaanu gaamo kaajjado olu hayyonni tantaname sharramanni nooha ikkikkinni dagate mereero hee’re keeraano olaho diranni afamannota xawisino.
Mootimma ola uurrisatenni qoqqowunni agurte fultinota dancha kaayyo gede horonsi’ratenni hunote gaamo Amaaru daga ledo tashshi’reemmo shallago nooe yaatenni millisanni noota coyi’rino.
Amaarunna Affaarete qoqqowubba horrinohu cancishaanchu gaamo smuli barruwa giddono Amaaru qoqqowira Wucaale yinanni baseranna Affaarete qoqqowirano Cifra yinanni qooxeessuwara ola fanatenni kiirotenni 30 ikkitannore keeraano mana shinota xawisino.
Horre amadino qooxeessuwara keeraano manna raafatunni shaanni afamannota qummi assinohu ministirchu; hunote wolqa manchi beetto ikke kalaqaminohuwiinni agarrannikki garinni keeraano manni aana barshe loosanni noota kulino.
Itophiya diigate ajuujasi Birra 24/2013M. Dra gargartote olanto Aliyye hajajo aana hedeweelcho ola fanatenni hanafinota qaagiissinohu ministirchu; konne hunote assootesi gobbate gargarooshshu olanto, Amaarunna Affaarete addi wolquwa sharrante gobba gatissinotano egensiisino.
Mootimma umise harinsho garinni hasiissanno qaafo adhitannotanna olu la’’annosikki manchi dino yee; cancishaanchu gaamo gobbate aana fanino ola duuchunku gargarooshshu olantora qoteho ikkite sharrantanno gede woshshatto assino.
Amsaalu Felleqe
Bakkalcho Birra 11, 2014 M.D Hamuse
