Hawaasa:-Ameerikunna wolootu Awuroppu Mittimma Itophiya AGOA Sumimmenni fushshate assitanno xiiwo Tigirayete oli ledo xaadannokkita Hawaasi Yuniversite marketing manejimentete Rosiisaanchinna xiinxallaanchi Pirofeeser Birhaanu Borjehu xawisino.
Pirofeeser Birhaanu Borjehu baxxinohunni Bakkalcho gaazeexi ledo assino hasaawinni xawisinonte gede, gobbaydi wolquwa baxxinohunni Ameeriku Tigirayete Qoqqowi ledo amadame noo olinni Itophiyu aana addi addi xiiwo assanni no; Ameeriku gobba Itophiyu aana assitanni noo xiiwo Tigirayete oli ledo amadisiisse xiiwo assitollana olu ledo xaadannori dino yiino.
Ameerikunna wolootu lophitino gobbuwa Itophiyu aana assitannoti addi addi xiiwo Tigirayete Qoqqowira assinanni hee`noonni seeru aliidimma ayirrisiisate oli korkaatinni dagate mannihimmate qoosso kisantanninna gawajantanni no yite coyidhurono; insati hedo hattenne ikkitinokkita kulinohu Pirof Birhaanu, insara soqqantannota HWAT woy THNG biiloonyu widira shiqqi assate assitanni noo xiiwo ikkitinota coyi’rino.
Pirf. Birhaanu Borjehu yaatto garinni, addi addi yannara Ameerikunna wolootu Awuroppu Mittimma Itophiyu aana agawo tugate assitanni noo xiiwo insa hasidhino garinni gumaame ikka hooginohura, xa kayinni Itophiya miinjunni ajishatenna gawajjate hassatto noonsahura AGOA sumimme giddonni fushshate kaajjite qaafanni no yiino.
AGOA Sumimme giddo wolootu gobbuwa agurranna Afiriku calunni 34 ale ikkitino gobbuwa miila ikkite noota kulinohu Pirof Birhaanu, AGOA sumimme diiga Itophiyu daga calla gawajjitannoha ikkikkinni Ameerika umose gawajjitannote.
Itophiyu Industirete Paarkenni loonse addi addi budu uduunne massine hirranniwi mitte Ameeriku gobba ikkitinohuranna kiirotenni haammata ikkitino Itophiyu qansooti hee`rannohu hatte gobba ikkinohura gawajjo Itophiyunnita calla ikkitukkinni insano qi’miiddannote yino.
Ameerikunna loobistootu Itophiyu AGOA sumimmenni fultanno gede hashsha barra raartannohu mannihimmate qoossora qarrante ikkitinokkita kulinohu Pirof. Birhaanu, Itophiyu soorrote kawa assanni noo lophote harinsho, Abbayi kofatto widoonni assinanni hee`noonnihu jawaatu loosi hattono daga mitimmatenni ikkite gobbansara assitanni noo sharro Itophiya albilicho qaafissanni nooti insara umu damuume ikkitinohura tini gobba miinjunni baqqi yaa dinose yite assitanni noo xiiwooti yiino.
Pirof Birhaanu xawishshi garinni, AGOA sumimme baxxinohunni lophitanni noo Afiriku gobbuwa laalchonsa gobbara sokkanno woyte giwirenna qaraxo baatukkinni eesidhanno gede illacha assine kalqanqoonni sumimme ikkitanna, Ameeriku miteekke Itophiya AGOA sumimme giddonni fushshannoha ikkiro Itophiyu assa noosiri jawa waaga fushshanno uduunne gobbanni giddora eessa hooga, wolootta gobbuwa ledo lende sumimme kalanqe hasiissanno uduunne insawiinni adhinanni kawiininno qolle sonkanni Itophiyu miinjunni gawajjamannokki gede assa dandiinannita huwachishino.
Abrahaam Saamueel
Bakkalcho Birra 11, 2014 M.D Hamuse
