Addis Ababa፡- Hettisamaano paartuwa miilla deerru deerrunkunni noo massagaanchimmate basera biilloonye amadde dagate soqqantanno gede assa gobbate hajora halamme loosatenna gobboomitte hajo lainohunni qansootu sumuu yitanno gede kaima ikkannota mitu mitu Itophiyu Pireesete Uurrinshara hedonsa uytinori paartete massagaano xawissu.
“Netsanetina Ikulinet party” murrichi Dr Abdulqaadir Ademihu uyino hedonni; konni albaanni noohu poletiku budinni hettisammaano paartuwa biilloonye amaddara agurranna daga uyitinonsa huuro nafa horonsidhannokki gede funganni keeshshinoonnita kule; xaa yannara kayinni mitticho paarte qeeltu gedensaanni qeeltinoti calla gashshitankunni halamme gobba gashshino yinanni assooti kalaqamasi naandannite hedooti.
Albillichono doorshu harinsho budinke kaajjanni; sai doorshinni woyyaawino garinni co’icha, dagatenni ammanamooshshu nooha ikkeenna mootimma sanfanniha ikkiro tini harinsho jawa rosicho ikkitanni hadhanno yino.
Mootimmate biilloonye amadanno manchi amadino biilloonyi daganniho yinohu murrichu; gaammoonni basera ammanamatenninna kakkaooshshunni qansoota baalanko taalo owaante aatenni egennotenninna noosi gadenni dagatenna gobbate qeechasi fulara agarrannita coyi’rino.
Gobbanke buxicho ikkasenni noonketi boode jirooti yinohu Dr Abdulqaadiri; mootimmate biilloonyira dangeemmo woyte paartete aleenni hedatenni noonketa shiima yanna, jironna wolqanke garunni horonsi’ne gumaamo looso loosa hasiissannota qummi assino.
Dr Abdulqaadiri xawishshi garinni; mitte gobbara kaajjado waaxote paarte amanyooti kalaqamanno gede hettisamaano paartuwa hasiissanno. Biilloonyu beeqqaano ikkitinorino ikkitinokki paartuwa halama hasiissannonsawa halantanni; hettisama hasiissuwano hettisantanni gobbanke keerira, latishshiranna dimokiraasera noonsa beeqqo kaajjishshe sufisa noonsa yino.
“Innaati Paarte” borreessancho ikkinohu kalaa Geetinneti Worquhuno isi widoonni; Jireenyu ayeeno beeqqaancho assitukkinni mootimma safi’rate dandiisitanno huuro afidhinoha ikkirono hettisamaano paartuwa biilloonye abase kayinni dancha rosichooti yino. Kunino ga’ara gobboomite hajubba lainohunni gutunni hasaanbe sumuu yaate dandiissannoha ikkasi coyi’rino.
Albi annuwinke worbimma ragissinonke; tini ilamano hiikko gari waagano baatte gobbase wolambinaate ayirrisiissanno yinohu kalaa Geetinneti; techo hettisamaano paartuwa beeqqaano assate hananfoonni safo ga’ara hettisamaano paartuwa mimmitu ledo; mootimma kayinni hettisamaano paartuwa ledo sumuu yitanni loossanno gede jawa xinta ikkanno.
Konni albaani keeshshinohu poletiku gadenke doorsha harinsi gedensaanni gamu usuramanno; gamu dubbo eanno woy poletiku battalanni agurte fultannota qaagiisse; kalaqaminohu haaru poletiku gadenni biilloonye amaddinori hettisamaano paartuwa miilla wolootunni roore gumaamma loossa loosatenni wolootuno hettisamaano paaruwa beeqqaano ikkitanno gede furcho fantannore ikka noonsa. Hanafo lowonta naandannitanna jawaatte sufa hasiissannota ikkiturono konne bokkeensine shiqinshanni poletiku daddalira hosiisi’ra kayinni dihasiissanno yino.
Hettisamaano paartuwa gobbate eltanno hedo shiqishshanninna gumultanni gobba ba’’atenni gatisate sharrantanni keeshshitino yinohu borreessaanchu; aantanno yannarano biilloonye amaddinorinna amaddinokkirino poletiku paartuwa duuchunkurinni gobba balaxisiisa noonsa. Mootimmano paartuwa amaddinota woyyaawa hedonna jawa wolqa konninni roore horonsidhanni gobbate lophora loosa hasiissannota qummi assino.
Amsaalu Felleqe
Bakkalcho Birra 4, 2014 M.D Hamuse
