Hawaasa:- Mootimma baincho assootenna mooraanchimma hunatenna gatisate kaajjado looso loosa nooseta mite mite Sidaamu qoqqowi teessaano coyidhino.
Booni gaangaawi woradi teesaanchi kalaa Shittaye Turuttihu yino garinni; mootimma dagate horaameeyyimmara loosannohanna loosannokkiha badate looso loosa hasiissannose yino.
Babbaxxino woradira addi addi handaarira loossanno massagaano hattono tsere mussinnu komishiine giddo loossanno loosaasine Kunni assootinni umonsa agaratenni halaalaancho keeno assitanni loosa noonsata xawisinohu kalaa Shittaye; mootimma gobbate hajo jireenyu widira reekkisate loosannohu ayiti yitannota keenanna qorqorsha assa; hakkii sa’’eno qajeelsha aa noose yiino. Jireenya irkisannonna baincho assote effi’re giwanno qansicha kalaqateno rosu minnara amanyootu roso rosiisa hasiissannotano buuxisiisino.
Itophiyu qansichi gede baincho assootenna mooraanchimma effi’re giwanna konne assoote gumultannore xawo fushatenni sharrama hassiissanno yiinohu kalaa Shittaye Turuttihu; togoo assitanno massagaano dagate ikkikkinni uminsa horora loossannore ikkansanni; dagoomu konne assoote la’’annonna macciishshanno yannara xawo fushshanna saalsiisa noosi yee coyi’rino.
Itophiyu pireesete uurrinshara baxxinohunni bakkalcho gaazeexira hedose uytinoti wole Wondo Gennetete teesaancho ikkitinoti dukko Alemtsehay Yaaqoowiti; Itophiyu mootimma baincho assootubba gatisate wo’naalanna lawishsha ikka noosetanna dagoomu giddono huwanyo cummishiishate looso gumulanna kuni assooti ilama hunannoha ikkasi egensiisa hasiissannoseta buuxisiissino.
Dukko Alemtsehay Yaaqoowiti; Baalunku noowa baala kakkae kuni coy ga’a mitti mittinke mine kisanno yitanno laalanni baincho assootubbanna mooraanchimma sharramanna xa’mantanno gede assate sayse aa dagatewiinni agarantannote yitino. Ledoteno konne assoote sharrama hanaffannohu mininni ikkinohura maate oosonsa surre suwisatenni baincho assootubbanni umonsa xeertissino qansoota ikkitanno gede waaga baata hasiissannono yitino.
Booni gaangaawi woradi teesaanchi kalaa Asaffi Fiqirehu isi widoonni; baincho assootubbanna mooraanchimma hunate kaajjado massagaanchimma hassiissanno yiino.
Aliidinni woro geeshsha noo tantanubbara kaajjadu massagaanchi kalaqamiro mooraanchimma huna dandaa hoongirono ajisha kayinni dandiinanni yiinohu Kalaa Asaffi; mootimmate loosi guma laalanno gede assate dagatewiinni kaajitino sharro agarantannota xawisino.
Abebech Maatewoos
Bakkalcho Birra 4, 2014 M.D Hamuse
