Hawaasa: Mootummate aana xiiwo kalaqate Itophiyu giwiru nookkiha dada`lannowiinni daddalu base sumimme (Ago”a) giddonni fushshate millimillo assitanni noo bissanna beeqqaano “loobistete” uurrinsha Itophiyu sumimmetenni fula haammata daga aana gawajjo iillishshanno daafira konne huwatte loosinsanni eemarantanno gede Industirete Paareke Latishshi Korporeeshine egensiisino.
Industirete Paarke Latishshi Korporeeshinehu Qaru Loosu Harisaanchi Kalaa Saandukaan Debbebehu, Hawaasi Industirete Paarke towaanyo assitanni noo gobbatenna baara widi Odeesaannora xawisinonte gede, Ago”a hanafote Ameeriku Pirezidaantichi diru dirunni looso keene tenne kaayyora ikkado ikkitino gobbuwa wirro la”ate biiloonyi noosehura, konne kaima assitino mitu mitu dagoomi kifillanna beeqqaano loobistete uurrinsha Itophiyu tenne hanqafonni fultnno gede loossanninna babbaxxitino doogonni xiiwo kalaqqanni noota xawisino.
Qaru Loosu Harisaanchi xawishshi garinni, 85 kumi ali qansooti Industirete Paarke giddo loossanni nootanna konni giddo xibbuunni 85 anga ale ikkannohu babbaxxitino gobbate qooxeessinni daayinohonna rosu qixxaawo nooikkiha ikkado qajeelsha adhite loosu widira e’ino seenneeti yiino.
Qaraxunna taaksiweello ikkitno sumimmenni lophitanni noo gobbuwa irkisate yine uynoonni kaayyo ikkitino daafira haammata Industirete Paarke giddo noo dureeyye Agoa mitte dancha kaayyo gede assite la`e adhitannota xawisino. Tini Industirete Paarkuwa qolte loosu kaayyo kalaqannoreeti; mine hosse looso hoogge dirinsa iillikkinni mine assi`ranno seennenna addi addi qarri giddo noo qansoota irksateeti. Tini Agoa umo assine illacha tungoonni mixo aana loossanni noota buunxoonnita kalaa Saandukaani huwachishino.
Kalaa Saandukaani xawisanni, Itophiya tenne hanqafonni fushshate mixidhe noo uurrinsha, mootummate aana xiiwo kalaqate yite hadhanni noo doogo Industirete Paarkera qaxarante loossanni noore 85 kumi ali qansoota gawajjote aana tuganno. Qoleno, gobbanke istaatiksetet garinni mittu mittu loosaasinchi mereerimunni 2.5 manna gashshanno daafira gawajjo dagate aana ubbannota coyrino.
Konnira, Itophiyu gobba Agoatenni fushshate loossanni noo bissa uminsaha ikkinohu illachu hee`rirono, mootummate aana iillitanno xiiwonni aleenni dhukiweelo daga aana iillishanno gawajjo shota ikkitinokkita affe uurrite wodanunni heda hasiissannota qummi assino.
Addi addi daga tini hajo mittu ajendi gede ikkite amadantanno gede xiiwo assitanni keeshshiturono, xaa geeshsha Ameeriku widoonni xawinsoonnirichi dino yiinohu Qaru Loosu Harisaanchi, Itophiyu mootumma kuni assooti busha ikkinotanna gawajjo mootimmatenni aleenni dagate aana jawa xiiwo kalaqannota leellishate wo`naalsha assitanni noota kulino. Xaano gumulote aana iillinoonnikki daafira Ameeriku mootumma boodu manni assanno kaphu coyi kaiminni so`re gumulote iillannoikki gede halaalanya mashalaqqe iillitanno gede assate looso kaajjinshe sufinsannita kulino.
Abrahaam Saamueel
Bakkalcho Birra 4, 2014 M.D Hamuse
