Hawaasa: Sidaamu qoqqowi giddo afantanno aja quchummanna olluubba dagganno yanna hedote giddo worino garinni lophitanno gede assate illachunni loonsanni hee’noonnita qoqqowunnihu layinki pirezidaantenna rosu Biiro sooreessi kalaa Beyyene Baraasihu coyi’rino.
Sidaamu qoqqowu quchumu latishshinna konstiraakishiinete biiro dirunnita songo harissino. Songote aana afaminohu qoqqowunnihu layinki pirezidaante kalaa Beyyene Baraasihu coyi’rino garinni; quchumma dagoomittetenna miinju lopho sa’’eno jireenyu mereershuwanna latishshu buussa ikkitinohura; techo calla ikkikkinni dagganno yanna hedote giddo woratenni lopha hasiissannonsa.
Babbaxxino ragira noo shiimmammadda olluubba quchumu widira sorrantanno, pilaanetenni irkisantanni dagganno yanna hedote giddo worino garinni lophitanno gede assate widoonni dancha safo noota coyi’rino. Tenne dancha hanafo kaajjishe sufisate illachunni loonsanni yiino.
Qoqqowoho afantanno quchumma teessaanote injiitinore ikkitanno gede, quchumma haanjanna biifado assate sa’’i dirira haammata loossa hanafantinota buuxisiisinohu layinki pirezidaantichi; hanafantino loossa konni dirirano suffanno yiino.
Quchumma teessaanote injeessatenna dagganno yanna hedote giddo worinoha ikkanno gede dandiisate assinanni wo’naalshi hendoonni guma abbanno gede dagate halamme hasiissanota buuxisiisinohu kalaa Beyyenne; daga quchuma biifisatenninna co’o assatenni uminsa qeecha fultara hasiisanno yiino.
Qoqqowoho quchumu latishshinna konstiraakishiinete biiro sooreessi kalaa Fisseha Fichoolihu isi widoonni; Sidaamu qoqqowo ikke tantanami gedensaanni woradu mereershuwanna woradu mereershuwa gobbaa noo quchummara hala’lado baajeete gaamatenni quchummate nooha safote latishshi qarra baxxinohunnino doogote qarra tirate looso loonsoonni.
Qoqqowu mootimmanni loosantino loossa dagate giddo kakkaooshshe kalaqqino yiinohu kalaa Fisseha Fichoolihu; daga riqiwo xa’midhara hasiissanno jajja lede riqiwiweelo fajjonsanni kayisatenni mootimma fushshitara heddino luphima woxe gatisa dandiitinotano buuxisiisino.
Quchumma pilaanetenni massagantara hasiisannota seeru aana worroonniha ikkirono; sa’u dirrara quchumma pilaanetenni massagamate foonqe noonsata xawisino.
Pilaanetenni massagantanni keeshshitino quchummara pilaanubbateno batinye qarrubba noonsare ikkansa aleenni; pilaanete garinni loosa hoogate mitiimmubba noota biirote sooreessi egensiisino.
Kalaa Fisseha Fichoolihu xawishshi gede; pilaanete ledo amadisiisante ka’anno qarrubba tirate pilaanubba oodiite assatenni uullara dirritannokki pilaanubba biddi assate looso loosatenni pilaanubba uullara dirritanno gede wo’naalsha assinoonni yiino.
Yannansa sa’ino pilaanubba wirro la’’atenni quchumma pilaanetenni massagantanno gede assate aleennino quchumma techo Calla ikkikkinni ga’a hedote giddo worino garinni tantanataranna lophitara loonsanni hee’noonnita buuxisiisino.
Baalante woradda massagaano lede batinye hajo la’annonsa bissa beeqqitino songora, sa’’i dirira gumulantino qara qara assootubba keenatenni, foonqe noonsa qooxeessuwa badatenni, amandoonni baajeetete dirinni foonqubba wonshate hasaawa assatenninna sumiimme kalaqatenni aantaancho millimillo assate qixxaamboonnita xawinsoonni.
Abebech Maatewoos
Bakkalcho Birra 4, 2014 M.D Hamuse
