Addis Ababa:-Cancishaanchi HWHT Itophiyaho Keeraanchimmate danqara ikkannokki deerra iilla geeshsha ganamonno yaatenni Olu wolquwa xaphoomu Itaamaazhoore Shuume Jeneraal Birihaanu Jula xawisi. Jeneral Birihaanu ESAT Televizhiine ledo keeshshi yannara xawisino garinni;Cancishaanchu HWHT Amaarunna Affaarete baatto amadde heedhara hasidhanno mangiste dino. Gargarooshshu Olantorano konninni baxxino uurrinshi dino
Amaarunna Affaarete mite mite woraddaranna zoonnara agursiisate;agursiisa calla ikkikkinni Amaaru qoqqowira e’ino wolquwa layinkita Amaaru qoqqowa e’annokki gedenna Itophiyaho bidhatto ikkitannokki deerrinni gannanni.
Cancishaanchu HWHT daafira hendeemmo wote Amaaru baattonni fushshate hedo dikkino hendeemmohu. Xuruurroommo xuruurino no.
Cancishaano gaamo Gobbate tii”ira dano ikkitannokknna gobbayidi soqqamaano hidhine Itophiyu diigamara loonsannikki bikkinni ganama noonsa.
Gobbate tii”i aana dano danqartinoti, Woyyaanete ikkinniina Itophiyu mangiste Tigirayete daga aana danqartino tii”u dano dino yinohu Jeneral Birihaanu;Tigirayetenni agurre fullummo wote la’noommo yino.
Cancishaanchu HWHT Gaamo caabbicho hunte,xaadooshshu xuruura murte,daga kaa’lo afidhannokki gede hoolte,qaaqquulle gadachite olaho dirte gudisiissanni keeshshitinota qaagiissino.. “Amaaru daga aaninni gatona gadachame Tigirayete daga haxo aaninni nafa dirra hasiissannosi” yino jeneraal Birihaanu. Cancishaano gaamo Itophiyu aana bikku ali gawajjo assino; bikku ali waagasino afi’ranno yaanni ledino. Konnirano ayirano dinye di uyineemmo. Loonseemmohu ninke sayinsenninna fullankenniiti ikkinnina dinyetenni loonseemmo loosi dinonke yaatenni duu’re xawisino.
Cancishaano gaamo hakkono ko’ono dagate aana illishshanni no gawajjo daga caacceessitara dandiitanno. Ikkollana kayinni,giiramatenninna caaccaawatenni di ikkino olu massagamannohu;ola harinsannihuno. Barra murrannihunna massangannihu umiseta ikkitino hoyyonniiti yino.
Kiphote dannu dino;kawiinni sa”a dino yineenna uurritannota dikkitino. Kipho Tigirayete widoogge hadhanno;Amaarano Affaareno hadhara dandiitanno. Olu godoshshiishaano wolquwano xiibbanno,tenne yannara gawajjo iillitannotano qummeessino.
Jeneraal Birihaanu xawishshi garinni; dagate aana gawajjo iillitanna,kuri daga shetto la’nanni sammi yine honseemmohu gede heddannoha ikkiro sodhino. Woyyaaneno xa amaddino gashshoote amadde keeshshitanno yee ayino hedara di hasiissanno.
Mito mito coye coyi’rammora di dandeemmo. Coyi’reemmokkihu dagate mashalaqqe hoolate ikkikkinni;mite mite mashalaqqe horosenni roore gawajjo batidhanno daafira mashalaqqe amandanni hasiissanno yannara daga mashalaqqe macciishshitanno yino Jeneraal Birihaanu .
Yaareed Geetaachew
Bakkalcho Birra 4, 2014 M.D Hamuse
