Addis Ababa: Co’itte anganninna suwashshu wodaninni Itophiyu daga owaatate qixxaamboommore ikka hasiissannonke yaatenni IFDR Xaphoomu Ministirchi Dr Abiy Ahimedihu xawisi.
Xaphoomu Ministirchi Dr Abiy, haaro mootoo’mitino ministirootiranna jajjabba loosu sooreeyyera Afiriku Massagote Fullanke Akaadaamera aa hanfoonni qajeelshi aana assino fanote hasaawinni, mooru amale ikkinose dagoominna manni lopha didandiitanno. Massagaano co’itte anganninna suwashshu wodaninni Itophiyu daga owaatate qixxaamboommore ikka hasiissannonke yiino.
Itophiyu daga owaattannonna owaatantanno biilto seekkite affino yiinohu xaphoomu ministirchi Dr Abiy, dagatenni ayirratenna ilamate sa”anno harumi looso loosate co’itte anganninna suwashshu wodaninni Itophiya jireensa hasiissannonke yiino.
Xabbino mixo amande daganke horaameette assate loonseemmoha ikkro; ilamate sa”anno haruma wora dandiissiisanno gedeno coy’rinohu Dr Abiy, mooranchimmanna huucci’raanchimma rumushshinsanni hunate baalunku mudhaanchimma xa’manno gede coy’rino.
Itophiya soorrate qarqaranke seekkine la”a ikkinnina nookkire kalaqa diagarranni’ne yiinohu xaphoomu ministirchi, buko uddidhinonna haayisso ciirtinota batinye Itophiyu jiro buko giggishshatenninna haayisso midatenni Itophiya duroonsa dandiinanni yiino.
Techo Inxooxxo, Baxillunna Mittimmate paarkubba loosantino qarqarra haayisso ciirtino dargubba ikkitino gede qaagiisse, tenne haayisso midatenni loosantino loossanni lowo eo afi’ranna lowo mannira loosu kaayyo kalaqa dandiinoonnitano xawisino.
Itophiya duroonsate yanna xaati; haaro massagaano qaru illachinsa noonke waa, baattonna mannu jiro garunni horonsi’ratenni Itophiya duroonsa agarranninsa gedeno Dr Abiy lede xawisino.
Dr Abiy ledoteno, gobbaydi xiiwo waajjishshannota ikkitukkinni Itophiyu jireenyira waalcho fantannoteno yee; xiiwo kaajjitunkenna xiiwammummo kiiro jireenyaho shafantannokki safo tuga dandiineemmo yiino.
Qajeelshu illachi massagaanote afisiisa, kakkaysiisanna gaamote ayyaana kaajjisha ikkitinota xawise; massagaano qajeelsha gudduro soorramate hasatto, affinore loosu aana hosiisate mudhaanchimmanna hedote kaajjilli hee’ransara hasiisanno gede xawisino. Daanno ontu dirira huucci’raanchimmatenni fulle laashshine ita, halammetenninna ayirrisammete aana safantino dippoloomaase heedhannonke gede assatenna ola gatissanno olanto ijaarsate, anga anga amadamme jawaantetenni, suwashshu wodaninninna co’itte anganni loosa hasiissanno yiino.
Jawa daganna jawa gobba owaata jawa kaayyooti; tenne jawa kaayyo horonsi’ratenni ilamate sa’’annonna dhaggete borreessamanno looso loonseemmo yanna ikka nooseno yiino xaphoomu ministirch.
Dr Abiy, Itophiyu jireenyi buuxamannohu Itophiyu noose jiro garunni latisatenni, kaajjine loosatenninna co’itte anganna suwadimmatenni ikkinotano huwachishino.
Massagaano qajeelshu gedensaanni hedote kaajjilli, gaamotenni loosate ayyaaninna qajeelshunni afidhino egenno loosu widira soorra heedhannonsa gede qummeesse; xiiwonna qarrubba Itophiyu jireenyira waalcho fantannore ikkinnina huuteessitankera dihasiissanno yee; jifo gaggassitunkekkinni luxuphine sa’a dandiinummoro jireenya shafantannokki safo aana wora dandiinanni gedeno buuxisiisino.
Manna ikkinnina, biilto ikkinoonke yiinohu xaphoomu ministirchi, jajjabba massagaanonna ministirooti eela dirrite daga owaata agartannonsa gede qaagiissino.
Jeefote xaphoomu ministeerchi Dr Abiy, duroo’mitino gobba duroo’mino dagooma kalaqqanno; fiyaamaminokki quchumura biifanno mine ikkinnina biifino quchumi hee’rara didandaanno. Duroo’mitino gobbanna quchuma ijaarsate tenne hende loosa hasiissanno gedeno qaagiissino.
Addisu Adoola
Bakkalcho Birra 4, 2014 M.D Hamuse
