Addis Ababa:- Haaro fooliishshonni safantinoti Itophiyu mootimma qansootu jifantannokkinna farco shokkitannokki gede kaajjishshe loosa hasiissannoseta amma’note annuwi huwachishshu. Amma’note annuwi haaro safantanno mootimma ga’labbi yitinotanna keerunnita ikkitanno gede beroo barra huuccatto assitinno.
‘’Itophiyanna dagase maassi’ri, agari’’ yaanno massagote qaalinni qixxeessinoonnita huuccattote qixxaawo baalante amma’no annuwi jaaloomu xawira harissino. Amma’note annuwi huuccatote qoteho baxxinohunni Itophiyu pireesete uurrinshara xawissino garinni; haaro fooliishshonni safantinoti haaro Itophiyu mootimma keerunna waagu lexxa aana illachishshe loosa hasiissannosetanna qansootu jifantannokki gede farco shokkitannokki gede loosa hasiissannoseta coyidhino.
Itophiyu kaatolikete amma’no roorrichu Phaaphaasichi Bitsui Kaardinaal Birhaane Iyyesuus Suraafeelihu isi widoonni; haaro mootimma safamasenni macciishshaminosi hagiirre xawise haaro mootimma gobbate mittimma agarsiisate widoonni Itophiyu daga mitte ikkase buuxisse loosa agarantannose yino.
Bitsui Kaardinaal Birhaane iyyesuusi xawishshi garinni; sirchunni, garetenni, wayinninna ilaalunni babbadama gatteenna Itophiyu daga mittimmansanni kaajjite uurritanno gede mootimmate jawa yawo noose. Xaa yannara leeltannoti waagu lexxa woyyaabbeenna daga dhukinsa garinni heedhanno gede assa hasiissanno. Darte gatteenna wedellu gobbansara loose soorramanno gede hattono loosu hoonge ajishate widoonni haaro mootimma jawu loosi agarannoseta xawisino.
Itophiyu Isliminnu hajubba xaphoomu amaale mininna Ulemu amaale mini qaru borreessaanchi Sheh Qasim Mehammed Taajuddiini; haaro mootimma safantinohu dagate fajjonninna sumiimmanni ikkinota qummi asse; mootimma dagate fajjonni biilloonye amaddinota ikkasenni dagate hasiissannota danchummate loossa gumula hasiissannose yino.
Safantino mootimma gobba hasidhannotanna daga agadhitanno hajo wonsha nooseta; gobbate aana keeru hala’lanno gede sharrama hasiissannoseta; yanna yannatenni lexxanni daynoha miinjunna uduunnu waagi qarrubba gatisate kaajjite loosa hasiissannosetanna dagano hudetenninna qarrunni fula nooseta Sheh Qaasimi xawisino.
Gobbate aana farco heedhara hasiisanno yinohu Sheh Qaasimi; annuwu huuccatto assitanno woyte ‘’ buxichu jifami, farco shokkitu yaanno yooaanchonna massagaancho uynke’’ yitannonte gede ‘’Ninkeno hasi’neemmohu tenneeti’’ yaanni coyi’rino. Qansootu jifantannokki gedenna farco shokkitannokki gede mootimmate massagaano kaajjite loosa hasiissannonsata huwachishinno. mootimmate owaante seerunna amanyootu aana massagama hasiissannose yino.
Itophiyu Ortodoksete amma’no mini baxxino borrro mininna gobbayidi hajo aliidi massagaanchi hattono Diredaawunna Jibuti qooxeessubba soqqansho aliidi Phaaphaasichi Bitsui Dokter Abune Aregaawi; Itophiyaho safantinoti haaro mootimma daga babbaxxitino dagoomittetenna gobboomu qarrinni fushshitanno yine hexxo assi’neemmo yino. Keerenna dagate heeshsho woyyeessatenni hattono loosu hoonge ajishatenni tiro daggara dandiitanno yite mootimmate aana ammana tugansa coyi’rino.
Haaro fooliishshonni safantinoti Itophiyu mootimma ga’labbi yitinnotanna keerunnita ikkitanno gede hende qixxeessinoonnita huuccattote qixxaawo beroo barra amma’note annuwi widoonni jaaloomu xawira harinsoonniha ikkanna; amma’note annuwi haaro mootimmate safonni Itophiya massagate yawo adhino xaphoomu ministrchi Dokter Abiy Ahimedihuranna mootimmasira dancha halcho xawissino.
Qiddist Gezaheny
Bakkalcho Wocawaaro 27, 2014 M.D Hamuse
