Xaphoomu Ministrchi Dr Abiy Ahimedihu aantanno dirrara mootimmate kaawinete miilla ministirootinni agarrannireeti yinore qara qara bixxille xawisino.
Beroo barra dagate riqiwamaano amaale mini 6ki diri umi doycho umi uurrinshu songo harisinoha ikkanna Xaphoomu Ministirchi Dr Abiy Ahimedihu kaawinete miillasi mootoonsino.
Konninni harunse Xaphoomu Ministirchinni mootoo’mitinori kaawinete miilla aantanno yannara, mootoo’mitino basera qarunni gumula hasiissannonsa loossaati yinore tittirshunni xawisinoha ikkanna; mooranna huucci’ra qarunni huna agarantannonsata duu’re huwachishinno. Moorunna huucci’ra heedheenna gobba jiroo’ma dandiitannokkihura moora tiyyidhe gibbannorenna huntanno kaawine ikkitanno gede xa’mino.
Layinkihunni kaawinete miilla ministroota ikkansanna ga’rete riqiwamaancho ikkate wo’naala federeeshiinete amaale mine gara ikkiturono kaawinete aana kayinni so’ro ikkitinota kaysino.
Hattono mittu manchi gobbaydi hajo ikkiro wo’mante Itophiyu dagara gobbaydi hajo ministircha ikke loosannotanna; mittu manchi Giwirinnu Ministrcha ikkiro wo’mante Itophiyu dagara Giwirinnu Ministircha ikke loosanno. Konni daafira mittu qooxeessira riqiwame hattoo hedonni loosannoha ikkiro hendeemmo Itophiya xiiwanno daafira mittu mittunku kaawinete miili tenne hedote giddo wora hasiissannosi yino.
Ministirchu sase hettisamaano Paarte miilla kaawinete miilla asse mootoonsinoha ikkanna konni ledo amadisiisaminohunni hedosi kaysanni; hettisamaano Paarte massagaano kaawinete miilla assinoommo’ne daafira uurrinsha massaganna uurrinsha giwa lowo geeshsha babbaxxitinore ikkitinota amaalete mine huwachishinno. Konni daafira gobbaanni hee’ne hedotenni xiimbanni woyte duuchuri shota ikkasinna giddora e’ne uurrinsha massanganni woyte lowo mitiimma heedhanno; uurrinsha kalanqe, massange guma abba shota ikkitinokkihura ki’ne umo’ne doogo fiitinanniri gede assitine adhe yaatenni sokkasi saysino.
Amadisiisatenni Ministere calla ikka ikkikkinni wolu laooshshino kaawinete giddora e’e loosantanno gede roso hananfanni umi ba’re ikkitino daafira yawonke batinyete yitine adha hasiissanno’ne; gobbate jireenyiranna latishshira mitteenni loosa dandiineemmota aantino ilamara leellishshinannire ikkitinara hasiisanno yino.
Qiddist Gezaheny
Bakkalcho Wocawaaro 27, 2014 M.D Hamuse
