Hawaasa:- Gobbankera 6ki doycho harinsooni gobboomunna qoqqowu doorshinni Sidaamu dagoomu co’icha, dimokiraasennihanna daga ammantinonna gashshitannonke wolambinate abbitannonke yitino paarte roore huuronni doodhitinoti qaangannite.
Dagatenni ammanamooshshe afidhe doorantino paarteno gobboomunna qoqqowu deerrinnino haaro mootimma safidhino.
Haaro mootimma safi’rateno balanxe qoqqowubbate haaro amaalete minnanna sanfoonniha ikkanna; konni garinnino Sidaamu dagoomu qoqqowi haaru amaale minino baabba Faantaye Kebbedeta qoqqowu amaale mini songaafitte; hattono kalaa Desta Ledamoha qoqqowu pirezidaante asse mootoonsino. Wolootano luphiima qoqqowu massagaano amaalete mini miillara shiqqeenna haa’ne kaajjinshe sa’noonni.
Haaro amaalete mine qoqqowu pirezidaante ikke wirro mootoo’minohu kalaa Desta Ledamohu tenne yannara assino hasaawinni; gobbankera doorshu dhaggenni co’icha, dimokraase nooha, keeraanchonna dagatenni ammanamooshshe afi’rino doorsha ha’rinseenna dagano aye xiiwono nookkiha hasidhino paarte doodhitino.
Dagatenni ammanamooshshe afidhe doorantinoti Jireenyu parteno haaro sanfoonnite qoqqowu amaale mineno daga soqqameemmose gede ammante uyitinonke biilloonyenna eeggo garunni fulatenna daganke raga-tuqa handaarranni beeqqaanonna horaameeyye assate hashsha barra yinummokkinni loonseemmo yaanni xawisino pirezidaantichu kalaa Desta.
Qoqqowu daga duuchunku handaari beeqqaanchimmanna horaameessimma buuxisate xaa geeshsha noo harinshonni woyyaawino deerrinni loosateno dagate ledo amaalammanni loonseemmo yinohu kalaa Desta; latishshu, ga’labbote, dimokraasete amanyootinni woyyaawa guma maareekkisiisateno gobboomu deerrinni amandoonni mixo gumulsiisateno jawu mini loosi agarannonke yino.
Konninnino qoqqowohonna qachu qooxeessuwara ga’labbo ge’anno gede haja la’annonsa bissa ledo qinaanbe loonsanniha ikkanna; baxxinohunni loosidhe galtinori laalchinna laalchima lophitannonna dagoomunniha miinju wolqa lossate; sagaletenni umo dandaatenna buximatenni fushshate aantanno yannara jawa illacha tunge loonsannita egensiisino.
Safote latishsha halashshate ragaannino, albaanni hanafante gooffukkinni doogo gattinota gumulatenninna haaruudde pirojektuwano dagoomaho iillisha dandiinanni garinni hanafisiisatenni dagoomu xa’mora dawaro qolatenna kasseenya lossateno handaaru uurrinshuwa loossansa mixote garinni gumultanno gede assinanni yino.
Qoqqowu daga mittimma kaajjishatenni wolootu roduuwu daganna dagoomi ledo noonke mittimma kaajishi’ratenni qoqqowuho ikko gobbate agarraninke qeecha garunni fulleemmo yaanniiti xawisinohu; pirezidantichu.
Sidaamu daga umise umose gashshate seeda dirrara assitinoti poletiku xa’mo sharro dawaro afidhinohu soorrote massagaanonniiti yinohu pirezidaantichu kalaa Desta; Sidaamu manni assino sharro leellishanno sumudano aantanno dirra giddo loonsannitano qummi assino.
Xaa yannara gobbannita soorrote harinshonna massagaano giwatenni dagate giddono ikko gobbate babbaxxitino baseranna baara widoonni heedhe Sidaamu daga gosatenna boosaallunni babbadate dagoomitte mashalaqqe qoollanni hadhonsa fincitannori wo’naaltanno wolquwa dagankera ikko gobbate eltannokkire ikkitinohura daga baqqinaatunni sharrantaranna kaphu duduwonsa adhitannokki gedeno huwachishino.
Qoqqowoho industirete latishshi handaarra halashshatenni qansootaho hala’lado loosu kaayyo kalaqatenna konninnino industirete hasiisannore giwirinnu laalcho loosidhe galtinori hala’ladunni laashshitanno gede hanadaara yaannasincho assate addi illacha tunge loonsannitano afate dandiinoonni.
Woloota dagoomaho owaante uyitannore dagoomittenna miinju uurrinshuwano halashshatenni agarranni owaante uyitanno gede assinannitano xawinsoonni.
Xaa yannara gobbanke tuncu yitinose jifo sa’anno gede qoqqowu mootimmanna daga agarranninke qeecha baala fulleemmo yinohu kalaa Desta; baxxinohunni gobbate dhiiga ikkinohu cancishaanchu HWHT gaamo aana hasiissanno qaafo baala adhineenna gobba keeraanchimma fulta geeshsha fooliishsho nookkiha loonseemmo yino.
Amsaalu Felleqe
Bakkalcho Wocawaaro 27, 2014 M.D Hamuse
